Farg‘ona tumanida fuqaroning qarzdorligi sabab uning avtomashinasi xatlanib, jarima maydonchasiga olib kirildi. Bu haqda Majburiy ijro byurosi “Daryo”ga xabar qildi.
Qayd etilishicha, byuroning Farg‘ona tumani bo‘limi ish yurituvida bo‘lgan FIB Farg‘ona tumanlararo sudining qarzdor K.X.dan undiruvchi ATB Mikrokredit bank foydasiga 35,2 million so‘m kredit qarzdorligi undirish haqidagi ijro hujjati bo‘yicha qarzdor K.X. davlat ijrochisi tomonidan bir necha marta ogohlantirilishiga qaramasdan, bank foydasiga kredit qarzini to‘lashdan bo‘yin tovlab kelgan.
24-oktabr kuni davlat ijrochisi tomonidan qarzdor K.X. Nexia-3 avtomashinasini boshqarib yurgani aniqlanib, ushlangan va xatlanib jarima maydonchasiga olib kirilgan.
“Endilikda qarzdor bank foydasiga qarzini to‘lamagan taqdirda, avtotransport vositasi sotish uchun elektron-onlayn auksion savdolariga chiqariladi”, — deyiladi xabarda.
Izoh (0)