Namangan viloyati Mingbuloq tumanida kompyuter klubidagi janjal pichoqbozlik bilan yakunlandi. Bu haqda “Bu kun” informatsion dasturida xabar qilindi.
Qayd etilishicha, Mingbuloq tumanida yashovchi fuqaro (2002-yilda tug‘ilgan) tungi soat 01:20 larda o‘ziga tegishli bo‘lgan Game Club nomli kompyuterxonada shu tumanda yashovchi tanishi bilan avvaldan bo‘lgan nizosi sababli o‘zaro janjallashgan. Raqibidan musht yegan kompyuterxona egasi klub oshxonasida bo‘lgan osh pichoq bilan tanishining qorin qismiga bir marotaba urib, tan jarohati yetkazgan.
Og‘ir jarohat olgan yigit shu yerdagi bolalar yordamida shifoxonaga olib ketilgan. Kompyuterxona egasi esa jinoyat qurolini yashirishga uringan.
Mazkur holat yuzasidan tekshiruv harakatlari olib borilib, hodisa sodir bo‘lgan joydan 200 metr uzoqlikdagi ariqdan pichoq topilgan. Jinoyat kodeksining 104-moddasi (qasddan badanga og‘ir shikast yetkazish) 2-qismi “l” bandi bilan jinoyat ishi qo‘zg‘atilib, ayblanuvchi qamoqqa olingan.
Izoh (0)