Janubiy Koreya prezidenti Yun Sok Yol agar Pxenyan muloqot va yadrosizlanishga tayyor bo‘lsa, Seul KXDRga siyosiy va iqtisodiy yordam ko‘rsatishini aytdi.
“Agar Shimoliy Koreya yadrosizlanishga qaror qilsa va muloqotga kirishsa, hukumatimiz bizning dadil rejamiz (yadrosizlanish yo‘lidagi muhim qadamlar evaziga Shimoliy Koreya iqtisodiyotini modernizatsiya qilish rejasi — “Daryo” izohi) asosida siyosiy va iqtisodiy yordam ko‘rsatish uchun qo‘lidan kelganini qiladi”, — deya Yonhap agentligi Yun Sok Yolning so‘zlaridan iqtibos keltirdi.
Shu bilan birga Janubiy Koreya prezidenti Shimoliy Koreyaning yaqinda o‘tkazgan ballistik raketa sinovlarini “BMT Xavfsizlik Kengashi rezolyutsiyalarini jiddiy buzish va xalqaro hamjamiyatga to‘g‘ridan to‘g‘ri qarshi chiqish” deb atadi.
“Ular nafaqat yadro qurolidan preventiv foydalanish niyatini ochiqdan ochiq e’lon qildi, balki aftidan yettinchi yadroviy sinovga tayyorgarlikni yakunladi”, — dedi u.
Yun Sok Yol AQSH va Yaponiya bilan xavfsizlik sohasida hamkorlik qilish orqali yirik imkoniyatlardan foydalangan holda Shimoliy Koreyani tiyib turishni kuchaytirishga va’da berdi.
Izoh (0)