Saudiya Arabistoni valiahd shahzodasi Muhammad bin Salmon shaxsiy suhbatlar chog‘ida Amerika prezidenti Jo Baydenni tanqid qiladi, uning ustidan kuladi va uning aqliy qobiliyatlarini shubha ostiga qo‘yadi. Bu haqda The Wall Street Journal qirollik hukumatidagi anonim manbalariga tayanib xabar berdi.

Ularning so‘zlariga ko‘ra, valiahd shahzoda o‘z maslahatchilariga AQSHning avvalgi prezidenti Donald Tramp bilan hamkorlik qilish u uchun “ancha afzalroq bo‘lgani”ni, Bayden esa Barak Obama davrida vitse-prezident bo‘lgan paytlaridayoq (2009—2017-yillar) unga ma’qul kelmaganini aytgan.

Bundan tashqari, Bayden iyul oyida bo‘lib o‘tgan uchrashuvda suhbat chog‘ida Saudiya Arabistonida inson huquqlarining buzilishi va 2018-yilda jurnalist Jamol Qoshiqchining o‘limini tilga olib, valiahd shahzodani g‘azablantirgan. Nashrning saudiyalik mansabdorlar orasidagi manbalari g‘arb mamlakatlari bilan munosabatlarda bosh masala neft va xavfsizlikdan iboratligi hafsalani pir qilishini aytgan.

Ar-Riyod WSJ’ning ma’lumotlarini rad etdi. “Anonim manbalar tomonidan qilingan da’volar butunlay yolg‘on. Qirollik yetakchilari o‘zaro hurmatga asoslangan munosabatlar muhimligiga ishongan holda, AQSH prezidentlariga doim katta hurmat bilan munosabatda bo‘lib kelgan”, — dedi Saudiya tashqi ishlar vaziri Faysal bin Farxon.

Oq uy matbuot kotibi Karin Jan-Pyer WSJ’ning ma’lumotlarini “bema’ni bayonotlar” deb atadi. “Lekin shuni aniq qilib aytishim mumkinki, prezident bu administratsiyada ishni boshlaganidan buyon Saudiya Arabistoni bilan aloqalarni qayta ko‘rib chiqish kerakligini yaqqol bildirgan, — deya qo‘shib qo‘ydi u. — Yaqinda OPEK+ tomonidan qabul qilingan qarorlar Rossiya bilan kelishilgan, bu dunyoning ko‘plab iqtisodiyotlariga zarar yetkazadi”.

Avvalroq AQSH prezidenti Jo Bayden OPEK+ning 2022-yilning noyabr va dekabr oylarida neft qazib olish kvotalarini qisqartirish haqidagi qaroridan so‘ng Vashington va Ar-Riyod o‘rtasidagi munosabatlarni qayta ko‘rib chiqish imkoniyatini ma’lum qilgan edi.