“Bog‘chada har 75 bolaga 1 nafar oliy ma’lumotli tarbiyachi to‘g‘ri kelyapti” — Alisher Qodirov ta’lim-tarbiya tizimidagi muammolar haqida

O‘zbekistondagi bog‘cha va maktablardagi ta’lim-tarbiya tizimida bir qator muammolar yechimini topmay kelmoqda. Bu haqda Oliy Majlis Qonunchilik palatasi spiker o‘rinbosari, “Milliy tiklanish” demokratik partiyasi markaziy kengashi raisi Alisher Qodirov fikrlarini aytib o‘tdi.

Bugun (25-oktabr) bo‘lib o‘tgan Oliy Majlis Qonunchilik palatasi yig‘ilishida Alisher Qodirov bog‘cha va maktablardagi tizimli muammolar va ularga yechim topish masalasida chiqish qildi.

Ta’lim-tarbiya tizimida ayrim muammolar o‘z yechimini topmay qolmoqda. Masalan, bog‘chalarda har 75 bolaga bir nafar oliy ma’lumotli tarbiyachi to‘g‘ri kelyapti. Shu bilan birga, bog‘cha tarbiyachilarini tayyorlash, ularning malakasi va kasbining jozibasini oshirish kerakligini takror-takror aytsak-da, masala hal bo‘lmayapti. Hali ham bitta tarbiyachi 1-1,5 million so‘m oylikka 20-25 ta bola bilan bitta guruhda ishlashiga to‘g‘ri kelmoqda. Bog‘cha tarbiyachisining muhimligi o‘qituvchinikidan kam emas, hatto ustuvorroq. Bog‘chaga majruhlangan bolalar kelyapti. Tarbiya metodikasi yo‘q. Bog‘cha yoshidagi bolalarni elementar tarbiya qilish metodikasi ishlab chiqilmagan.

Alisher Qodirov ta’kidlashicha, dunyoda 6 ta davlatda bolalarni ilk davrda tarbiyasini tatbiq qiluvchi ilmiy tadqiqot institutlari bor.

“Balki O‘zbekistonda ham shunday institut tashkil qilishimiz kerakdir. Chunki ilk tarbiya metodikasi masalasida juda oqsayapmiz. Ko‘p xatolarga yo‘l qo‘ymoqdamiz. Maktabgacha ta’lim vazirligi qoshida mana shunday tadqiqot institutini tashkil etish juda ham muhim va zarur. Yana bir masalani afsus bilan aytishim kerak, hanuzgacha maktabgacha ta’lim tizimida samarali va sifatli ovqatlanishni sharoit yaratib berilsa-da, yo‘lga qo‘ya olmayapmiz”, – dedi deputat.

Shu bilan birga, spiker o‘rinbosari maktab tizimidagi ayrim muammolarga ham to‘xtalib o‘tdi.

Maktablarda ham juda og‘ir muammolar bor. Tizimda 500 ming nafarga yaqin pedagoglar ishlaydi. Ularning malakasini oshirish uchun qancha pul xarajat qilishimizdan qat’iy nazar, dunyoqarashi va fikrini o‘zgarib qo‘ya olmaymiz. Afsuski, maktablardagi pedagoglarning dunyoqarashi zamonaviy pedagogika talablariga javob bermaydi. Dunyoning rivojlangan davlatlari butunlay boshqacha maktab realliklarida yashayapti. Lekin biz hanuzgacha pedagoglarni malakasini oshirish uchun trillionlab pul ishlatyapmiz. Va albatta, kutayotgan natijamizga erishayotganimiz yo‘q. Shu sababli men taklif qilgan bo‘lardimki, 10 yillik yangi avlod pedagoglarini tayyorlash dasturi ishlab chiqilishi kerak. Yana bir masala: bolalar uchun yo‘naltirilgan ommaviy axborot vositalari bugun bankrot holatda. Ularning birortasi qo‘llab-quvvatlanmayapti. Bolalarimiz qo‘shimcha o‘qishni mana shu jurnallar orqali o‘rganishi kerak. Ular yo‘q bo‘lib ketish arafasida turibdi. Arzimagan mablag‘lar haqida gap ketyapti. Shularga e’tibor qaratish juda ham zarur.