Ўзбекистондаги боғча ва мактаблардаги таълим-тарбия тизимида бир қатор муаммолар ечимини топмай келмоқда. Бу ҳақда Олий Мажлис Қонунчилик палатаси спикер ўринбосари, «Миллий тикланиш» демократик партияси марказий кенгаши раиси Алишер Қодиров фикрларини айтиб ўтди.
Бугун (25 октябрь) бўлиб ўтган Олий Мажлис Қонунчилик палатаси йиғилишида Алишер Қодиров боғча ва мактаблардаги тизимли муаммолар ва уларга ечим топиш масаласида чиқиш қилди.
Таълим-тарбия тизимида айрим муаммолар ўз ечимини топмай қолмоқда. Масалан, боғчаларда ҳар 75 болага бир нафар олий маълумотли тарбиячи тўғри келяпти. Шу билан бирга, боғча тарбиячиларини тайёрлаш, уларнинг малакаси ва касбининг жозибасини ошириш кераклигини такрор-такрор айтсак-да, масала ҳал бўлмаяпти. Ҳали ҳам битта тарбиячи 1-1,5 миллион сўм ойликка 20-25 та бола билан битта гуруҳда ишлашига тўғри келмоқда. Боғча тарбиячисининг муҳимлиги ўқитувчиникидан кам эмас, ҳатто устуворроқ. Боғчага мажруҳланган болалар келяпти. Тарбия методикаси йўқ. Боғча ёшидаги болаларни элементар тарбия қилиш методикаси ишлаб чиқилмаган.
Алишер Қодиров таъкидлашича, дунёда 6 та давлатда болаларни илк даврда тарбиясини татбиқ қилувчи илмий тадқиқот институтлари бор.
«Балки Ўзбекистонда ҳам шундай институт ташкил қилишимиз керакдир. Чунки илк тарбия методикаси масаласида жуда оқсаяпмиз. Кўп хатоларга йўл қўймоқдамиз. Мактабгача таълим вазирлиги қошида мана шундай тадқиқот институтини ташкил этиш жуда ҳам муҳим ва зарур. Яна бир масалани афсус билан айтишим керак, ҳанузгача мактабгача таълим тизимида самарали ва сифатли овқатланишни шароит яратиб берилса-да, йўлга қўя олмаяпмиз», – деди депутат.
Шу билан бирга, спикер ўринбосари мактаб тизимидаги айрим муаммоларга ҳам тўхталиб ўтди.
Мактабларда ҳам жуда оғир муаммолар бор. Тизимда 500 минг нафарга яқин педагоглар ишлайди. Уларнинг малакасини ошириш учун қанча пул харажат қилишимиздан қатъий назар, дунёқараши ва фикрини ўзгариб қўя олмаймиз. Афсуски, мактаблардаги педагогларнинг дунёқараши замонавий педагогика талабларига жавоб бермайди. Дунёнинг ривожланган давлатлари бутунлай бошқача мактаб реалликларида яшаяпти. Лекин биз ҳанузгача педагогларни малакасини ошириш учун триллионлаб пул ишлатяпмиз. Ва албатта, кутаётган натижамизга эришаётганимиз йўқ. Шу сабабли мен таклиф қилган бўлардимки, 10 йиллик янги авлод педагогларини тайёрлаш дастури ишлаб чиқилиши керак. Яна бир масала: болалар учун йўналтирилган оммавий ахборот воситалари бугун банкрот ҳолатда. Уларнинг бирортаси қўллаб-қувватланмаяпти. Болаларимиз қўшимча ўқишни мана шу журналлар орқали ўрганиши керак. Улар йўқ бўлиб кетиш арафасида турибди. Арзимаган маблағлар ҳақида гап кетяпти. Шуларга эътибор қаратиш жуда ҳам зарур.Аввалроқ халқ таълими вазири Бахтиёр Саидов Ўзбекистондаги 10 мингдан ортиқ мактабдан уч мингга яқинида ошхона йўқлиги ва болаларни овқатлантириш тизимида бир қатор муаммолар борлигини айтганди.
Изоҳ (0)