Shavkat Mirziyoyev Qozog‘iston prezidenti Qosim-Jo‘mart To‘qayevga ushbu mamlakatning milliy bayrami — Respublika kuni munosabati bilan tabrik yo‘lladi. Bu haqda prezident matbuot xizmati xabar berdi.
Qayd etilishicha, davlat rahbari o‘zbekistonliklar qardosh Qozog‘iston xalqining quvonchiga samimiy sherik ekanini ta’kidlab, hamkasbiga mustahkam salomatlik, mas’uliyatli davlatchilik faoliyatida ulkan muvaffaqiyatlar, Qozog‘iston xalqiga esa farovonlik, baxt-u saodat va doimiy ravnaq tiladi.
Ma’lumot o‘rnida, bugun, 25-oktabr kuni Qozog‘istonda 13 yildan buyon birinchi marta Respublika kuni nishonlanmoqda. Bayram 2009-yilda bekor qilingandi, biroq bu yil prezident Qosim-Jo‘mart To‘qayev tashabbusi bilan unga milliy bayram maqomi qaytarib berildi.
Ostonada va boshqa yirik shaharlarda tantanali va ko‘ngilochar tadbirlar o‘tkazilmoqda, kechqurun esa poytaxtda bayram mushakbozligi bo‘lib o‘tadi. Ertalab davlat rahbari qarorgohi yonida davlat bayrog‘ini ko‘tarish marosimi o‘tkazildi.
2022-yil iyulida Milliy qurultoy majlisida To‘qayev milliy bayramlar ro‘yxatiga bir qator o‘zgartirishlar kiritish vaqti kelganini aytgandi.
Mavzuga doir: Shavkat Mirziyoyev 27-oktabr kuni Qozog‘istonga boradi
Izoh (0)