O‘zbekiston va Rossiya iqtisodiy hamkorlikni rivojlantirish masalasini muhokama qildi

Toshkentda 23-oktabr kuni O‘zbekiston va Rossiya o‘rtasidagi iqtisodiy hamkorlik bo‘yicha hukumatlararo komissiyaning 23-yig‘ilishi bo‘lib o‘tdi.

Investitsiyalar va tashqi savdo vazirligining xabar qilishicha, Jamshid Xo‘jayev va Rossiya hukumati raisi o‘rinbosari — sanoat va savdo vaziri Denis Manturov hamraislik qilgan yig‘ilishda ikki davlat o‘rtasidagi savdo-iqtisodiy, investitsiyaviy, sanoat, transport va logistika, madaniy-gumanitar hamkorlikka oid keng ko‘lamli masalalar ko‘rib chiqildi.

Xususan, keyingi yillarda ijobiy o‘sish tendensiyasi kuzatilayotgan o‘zaro savdoni rivojlantirish istiqbollari tahlil qilindi. Mutasaddi rahbarlarga ikki tomonlama savdoni diversifikatsiya qilish va uning hajmini sifat jihatidan yangi bosqichga ko‘tarish bo‘yicha amaliy chora-tadbirlar ko‘rish topshirildi.

Ikki mamlakat o‘rtasidagi investitsiyaviy hamkorlik va sanoat kooperatsiyasining hududlar va tarmoqlar kesimidagi joriy holati ko‘rib chiqildi. Neft-kimyo, tog‘-kon metallurgiya, energetika, sog‘liqni saqlash va farmatsevtika, qurilish materiallari ishlab chiqarish, yengil sanoat, meva-sabzavot mahsulotlarini qayta ishlash kabi sohalarda yangi loyiha tashabbuslarini ishlab chiqish va amaldagi qo‘shma loyihalarni jadallashtirishga o‘zaro qiziqish bildirildi.

Yig‘ilishda Manturov Rossiya O‘zbekiston avtomobil butlovchi qismlarini yetkazib berishdan manfaatdor ekanini bildirib o‘tgan. Iyul oyida Denis Manturov kompaniyalarga O‘zbekistondan Rossiyaga avtomobillarni parallel import sxemalari bo‘yicha olib kirishga ruxsat berishni taklif qilgan edi.

Kun tartibidagi yana bir muhim yo‘nalish hududlararo hamkorlikni rivojlantirish bo‘ldi. Oldindan tasdiqlangan rejalar asosida ikki davlatning qator hududlaridan delegatsiyalarning o‘zaro tashriflari tashkil qilingani ma’lum qilindi. Ushbu boradagi ishlarni davom ettirish maqsadida, boshqa choralar qatorida, muntazam onlayn muzokaralar tashkil etish orqali yangi investitsiya loyihalari va savdo bitimlari bo‘yicha takliflar ishlab chiqishga kelishildi.

Uchrashuv yakunlari bo‘yicha Yakuniy protokol va tadbir davomida erishilgan asosiy kelishuvlarni aks ettiruvchi ikki tomonlama hujjatlarning salmoqli to‘plami imzolandi.

Mavzuga doir: O‘zbekiston va Rossiya o‘rtasidagi tashqi savdo aylanmasi 8,5 mlrd dollarga yetishi kutilmoqda