O‘zbekiston Islom sivilizatsiyasi markazi rahbari Shoazim Minovarov noyabr oyida Fransiyaning Luvr muzeyida o‘tkaziladigan ko‘rgazma O‘zbekistonni dunyoga tanitishda juda katta qadam bo‘lishini aytib o‘tdi.
“2018-yil Shavkat Mirziyoyev Fransiyaga tashrif buyurdi. Bu Yevropa mamlakatlariga birinchi tashrifi edi. Birinchi tashrif aynan Fransiyaga bo‘lganining o‘ziga xos ramziy tomoni bor. Chunki Fransiya ham, O‘zbekiston ham o‘z siyosatida, boshqa mamlakatlar bilan hamkorlikda madaniy hamkorlikka juda katta ahamiyat qaratadi.
Fransiyaga tashrif vaqt jihatidan qisqa bo‘lsa ham, prezident Luvr muzeyiga borishga vaqt ajratdi. Hammamiz bilamizki, Luvr dunyoning eng katta muzeylaridan bittasi. Parijni jahon madaniyatining markazi deyishadi. Bu yerda Luvrning juda katta o‘rni bor.Luvrga tashrif paytida hurmatli prezidentimizga tarjimon sifatida hamrohlik qilish sharafiga muyassar bo‘lganman. Luvr juda katta taassurot qoldirdi hurmatli prezidentimizda. Umuman, davlatimiz rahbari san’atni juda yaxshi ko‘radi, san’atni qadrlaydi.Luvr muzeyi bilan mana bu yil o‘tadigan ko‘rgazmani o‘tkazish bo‘yicha shartnoma imzolangandi.
Mana oradan vaqt juda tez o‘tdi. Ko‘rgazmaning nomi “O‘zbekiston vohalarining ulug‘vorligi” va “Karvon yo‘llarida” deb ataladi. Ko‘rgazmaga biz eng zo‘r osori-atiqalarimizni olib borib, namoyish qilamiz. Bularning ichida alohida ta’kidlashimiz kerak bo‘lgani — Kattalangar Qur’oni. Bu noyob Qur’on XVIII-XX asrlarga oid deb taxmin qilinmoqda. O‘tkazilgan uglerod tahlillari shunday xulosa qilishga sabab bo‘lyapti. Lekin undan ham qadimiyroq bo‘lishi mumkin. Shu sababli bu Qur’onga dunyo bo‘yicha qiziqish katta. Qolaversa, 320 dan ortiq eng yaxshi eksponatlarimizni olib boryapmiz.
Bu ko‘rgazma juda samarali bo‘ladi deb o‘ylayman. Chunki madaniy yo‘nalishdagi hamkorlik fransuzlarga bizni ko‘proq tanitadi.Fransiyaga bir yilda 60 million sayyoh keladi. Luvrning o‘ziga 10 million sayyoh tashrif buyuradi. Bular san’atni, madaniyatni qadrlaydigan insonlar. Mana shunday joyda aprel oyigacha O‘zbekiston ko‘rgazmasi namoyish etilishi bizni ko‘proq e’tirof qilishlariga, mamlakatimiz, madaniyatimizga, tariximizga nisbatan qiziqishning yanada oshishiga xizmat qiladi. Bu O‘zbekiston uchun juda katta reklama bo‘ladi.
Deyarli bir paytda Arab dunyosi institutida ham buyuk ipak yo‘li bo‘yicha ko‘rgazma tashkil etiladi. Bu ko‘rgazmada ham muzeylarimizdagi eng asl eksponatlar namoyishi bo‘ladi. Bu yerdagi ko‘rgazma O‘zbekistonni nafaqat Yaponiyadan tortib Fransiyagacha, balki arab mamlakatlariga ham yaqindan tanishtiradi.
Umid qilamizki, bu qadam samarali bo‘ladi”, — dedi Shoazim Minovarov.
Izoh (0)