Тошкентда 23 октябрь куни Ўзбекистон ва Россия ўртасидаги иқтисодий ҳамкорлик бўйича ҳукуматлараро комиссиянинг 23-йиғилиши бўлиб ўтди.
Инвестициялар ва ташқи савдо вазирлигининг хабар қилишича, Жамшид Хўжаев ва Россия ҳукумати раиси ўринбосари — саноат ва савдо вазири Денис Мантуров ҳамраислик қилган йиғилишда икки давлат ўртасидаги савдо-иқтисодий, инвестициявий, саноат, транспорт ва логистика, маданий-гуманитар ҳамкорликка оид кенг кўламли масалалар кўриб чиқилди.
Хусусан, кейинги йилларда ижобий ўсиш тенденцияси кузатилаётган ўзаро савдони ривожлантириш истиқболлари таҳлил қилинди. Мутасадди раҳбарларга икки томонлама савдони диверсификация қилиш ва унинг ҳажмини сифат жиҳатидан янги босқичга кўтариш бўйича амалий чора-тадбирлар кўриш топширилди.
Икки мамлакат ўртасидаги инвестициявий ҳамкорлик ва саноат кооперациясининг ҳудудлар ва тармоқлар кесимидаги жорий ҳолати кўриб чиқилди. Нефть-кимё, тоғ-кон металлургия, энергетика, соғлиқни сақлаш ва фармацевтика, қурилиш материаллари ишлаб чиқариш, енгил саноат, мева-сабзавот маҳсулотларини қайта ишлаш каби соҳаларда янги лойиҳа ташаббусларини ишлаб чиқиш ва амалдаги қўшма лойиҳаларни жадаллаштиришга ўзаро қизиқиш билдирилди.
Йиғилишда Мантуров Россия Ўзбекистон автомобиль бутловчи қисмларини етказиб беришдан манфаатдор эканини билдириб ўтган. Июль ойида Денис Мантуров компанияларга Ўзбекистондан Россияга автомобилларни параллел импорт схемалари бўйича олиб киришга рухсат беришни таклиф қилган эди.
Кун тартибидаги яна бир муҳим йўналиш ҳудудлараро ҳамкорликни ривожлантириш бўлди. Олдиндан тасдиқланган режалар асосида икки давлатнинг қатор ҳудудларидан делегацияларнинг ўзаро ташрифлари ташкил қилингани маълум қилинди. Ушбу борадаги ишларни давом эттириш мақсадида, бошқа чоралар қаторида, мунтазам онлайн музокаралар ташкил этиш орқали янги инвестиция лойиҳалари ва савдо битимлари бўйича таклифлар ишлаб чиқишга келишилди.
Учрашув якунлари бўйича Якуний протокол ва тадбир давомида эришилган асосий келишувларни акс эттирувчи икки томонлама ҳужжатларнинг салмоқли тўплами имзоланди.
Мавзуга доир: Ўзбекистон ва Россия ўртасидаги ташқи савдо айланмаси 8,5 млрд долларга етиши кутилмоқда
Изоҳ (0)