Ўзбекистондаги My Freighter юк ташувчи авиакомпания ўзининг илк самолёти — Boeing-747 га эга бўлди.
Uzbekistan Airports’нинг хабар қилишича, 23 октябрь куни маҳаллий вақт билан соат 17:03 да авиакомпаниянинг ушбу самолёти Тошкент халқаро аэропортига келиб қўнди. Самолёт анъанавий равишда сув аркаси билан кутиб олинди.
Жумбо Жет номи билан танилган ва 105 тонна сиғимга эга Boeing-747 My Freighter компаниясининг биринчи шахсий юк самолёти бўлди. 2019 йилда ташкил этилган компания шу пайтгача Uzbekistan Airways’дан ижарага олинган самолётларда юк рейсларини амалга ошириб келган.
Яқин келажакда My Freighter яна бешта Boeing-747 юк самолётини сотиб олишни, яқин беш йил ичида эса паркни 20 та юк самолётигача етказишни режалаштирмоқда. 2022 йилда компания юк рейслари сони 410 тага етди.
My Freighter Хитойнинг ўнта йирик шаҳрида ўз омборларига эга, юк йиғиш пунктлари Европада Чехия, Люксембург, Германия, Франция, Италия ва Нидерландияда, шунингдек, БААда, Жанубий Кореяда, Россия, Бразилия ва Вьетнамда жойлашган.
Изоҳ (0)