«Ногиронлиги бўлган шахслар ҳимояси давлат эътиборидаги масала» — Танзила Норбоева

Ногиронлиги бўлган шахслар ҳимояси давлат эътиборидаги масала, аммо улар учун ижтимоий объектлар ва жамоат транспортларида етарлича шароит яратилмаган. Бу ҳақда Сенат раиси Танзила Норбоева парламент юқори палатаси кенгашининг навбатдаги мажлисида айтиб ўтди.

Сенат ахборот хизматининг «Дарё»га маълум қилишича, Танзила Норбоева ногиронлиги бор инсонларга барча зарур шарт-шароитларни яратиш долзарб масала эканини таъкидлаган.

Ногиронлиги бўлган шахслар ҳимояси давлат эътиборидаги масала. Лекин шу билан бирга мазкур соҳада, айниқса халқаро мезонларнинг талабларидан келиб чиқиб, мамлакатда «тўсиқсиз муҳит»ни шакллантириш масалаларига янада жиддий эътибор қаратишимиз лозим. Бу борада етарлича муаммоларимиз бор. Оддийгина кундалик ҳаётимизда бундай масалаларга кўплаб дуч келамиз – транспортда, овқатланиш шохобчаларида, хизмат кўрсатиш объектларида, маданий – кўнгилочар муассасаларда (театр, кино, музей ва бошқалар) ногиронлиги бор шахслар учун шароитлар яратилмаган. Албатта бу вазифанинг ечими бир-икки куннинг иши эмас. Лекин бу йўналишда амалий ҳаракатларни бошлаш вақти аллақачон келган.

Эътиборлиси, жорий йилнинг февраль ойида Барқарор ривожлантириш соҳасидаги миллий мақсадлар ва вазифаларнинг амалга оширилишини назорат қилиш бўйича Парламент комиссияси мажлиси доирасида ҳам мазкур муаммоларга тўхталиб ўтгандик. Хусусан, жамоат транспортидаги ноқулайликлар, жумладан метрополитендан эркин фойдаланишдаги тўсиқлар, унинг қайси бекатлари мослаштирилгани тўғрисида маълумотларни етишмаслиги ва бошқа қатор муаммолар муҳокама қилинганди. Ҳозирги ўрганиш якунлари ҳам мазкур масалалар ҳали ҳамон долзарб бўлиб турганини кўрсатмоқда.

Бу муаммоларни бартараф этиш учун зарур барча имкониятлар ишга солиниши лозим. Ҳар бир идора, вазирлик ўз функционал йўналиши доирасида мазкур муаммолар юзасидан нафақат таклиф киритиши, балки муаммонинг  ечимини ҳам бериши зарур. Албатта, ногиронлиги бўлган шахслар учун «тўсиқсиз муҳит» яратиш ва уларнинг барча иқтисодий-ижтимоий шарт-шароитларини таъминлаш, шу жумладан, уларни касбга тайёрлаш ва ҳунар ўргатиш, мазкур шахсларнинг ва уларнинг фарзандлари саломатлиги каби масалалар давлатнинг зиммасидаги вазифасидир. Шу билан бирга, бундай юртдошларимиз билан боғлиқ муаммоларни ҳал этишда дахлдорлик ҳисси жамиятимизнинг ҳар бир аъзосида бўлиши муҳим. Қачонки, мана шу 800 минг юртдошимиз ҳам жамиятимизнинг тўлақонли, тенг аъзоси эканини давлатнинг ва атрофидаги инсонларнинг кўмагида, ўз турмуши сифати ўзгарганида, яхшиланганида кўрсин.