Qashqadaryo prokuraturasi “Daryo”da e’lon qilingan xabarga javoban Qarshi shahrining sobiq hokimi Jamshid Fozilovga nisbatan qo‘llanilgan qamoq ehtiyot chorasi bekor qilinganini tasdiqladi.
Aniqlanishicha, Jamshid Fozilov 2016-yil 9-iyul kunidan 2019-yil 26-oktabr kuniga qadar Qarshi shahri hokimi lavozimida ishlab kelishi davomida o‘ziga berilgan mansab vakolatlaridan qasddan foydalanib, mansab vakolatlari doirasidan chetga chiqadigan harakatlarni amalga oshirgan.
U O‘zbekiston Respublikasi Qonunlari, prezident va Vazirlar Mahkamasi hujjatlariga zid ravishda ularni noto‘g‘ri talqin qilish orqali davlat zaxirasidagi yerlarni va boshqa mulklarni, shaxsiy mulki sifatida tasarruf etgan. Qarshi shahar hokimligi huzuridagi yer uchastkalariga egalik qilish, foydalanish va ijaraga berish masalalarini ko‘rib chiqish doimiy komissiya a’zolari — shahar hokimining qurilish bo‘yicha o‘rinbosari U.Avazov, shahar hokimligi bosh yuriskonsulti Sh.Buxarov, shahar bosh arxitektori Sh.Bo‘ronov, Davlat kadastrlari palatasi Qarshi shahar filiali boshlig‘i M.Xushov va boshqalar bilan shahar hududidagi yer maydonlari va boshqa infratuzilma obyektlarini noqonuniy ravishda soxta hujjatlar asosida berish haqida oldindan jinoiy til biriktirib, 2018—2019-yillar davomida 54 ta holatda umumiy qiymati 60 milliard 512 million bo‘lgan jami 463,212,13 metr/kv yer uchastkalarini o‘z kuchini yo‘qotgan Vazirlar Mahkamasi qarorlari yoki boshqa soxta ma’lumot, yozuvlar kiritib tayyorlangan dalolatnomalarga asosan, auksionsiz noqonuniy yer ajratish to‘g‘risida qarorlar qabul qilib talon-toroj qilgan, — deyiladi viloyat prokuraturasi xabarida.Qo‘shimcha qilinishicha, Jinoyat ishlari bo‘yicha Qarshi shahar sudining 2022-yil 20-oktabrdagi ajrimiga ko‘ra, Jinoyat protsessual kodeksining 242-2-moddasiga asosan viloyat prokuraturasi tomonidan kiritilgan qamoqqa olish tarzidagi iltimosnoma rad etilib, uy qamog‘i ehtiyot chorasi qo‘llanilgan.
Sudning mazkur ajrimiga nisbatan Qarshi shahar prokurori tomonidan viloyat sudining Jinoyat ishlari bo‘yicha apellyatsiya instansiyasiga apellyatsiya tartibida protest keltirildi. Jinoyat ishlari bo‘yicha viloyat sudining yakuniy to‘xtamidan keyin jinoyat ishi bo‘yicha qo‘shimcha ravishda tegishli munosabat bildiriladi, — deyiladi prokuratura munosabatida.“Daryo” manbasining qo‘shimcha qilishicha, jinoyat ishlari bo‘yicha apellyatsiya instansiyasiga apellyatsiya tartibida kiritilgan protest ertaga, 22-oktabr kuni ko‘rib chiqiladi.
Izoh (0)