Қашқадарё прокуратураси Қарши шаҳрининг собиқ ҳокимига нисбатан қўлланилган қамоқ бекор қилинганини тасдиқлади

Қашқадарё прокуратураси «Дарё»да эълон қилинган хабарга жавобан Қарши шаҳрининг собиқ ҳокими Жамшид Фозиловга нисбатан қўлланилган қамоқ эҳтиёт чораси бекор қилинганини тасдиқлади.

Аниқланишича, Жамшид Фозилов 2016 йил 9 июль кунидан 2019 йил 26 октябрь кунига қадар Қарши шаҳри ҳокими лавозимида ишлаб келиши давомида ўзига берилган мансаб ваколатларидан қасддан фойдаланиб, мансаб ваколатлари доирасидан четга чиқадиган ҳаракатларни амалга оширган.

У Ўзбекистон Республикаси Қонунлари, президент ва Вазирлар Маҳкамаси ҳужжатларига зид равишда уларни нотўғри талқин қилиш орқали давлат захирасидаги ерларни ва бошқа мулкларни, шахсий мулки сифатида тасарруф этган. Қарши шаҳар ҳокимлиги ҳузуридаги ер участкаларига эгалик қилиш, фойдаланиш ва ижарага бериш масалаларини кўриб чиқиш доимий комиссия аъзолари — шаҳар ҳокимининг қурилиш бўйича ўринбосари У.Авазов, шаҳар ҳокимлиги бош юрисконсулти Ш.Бухаров, шаҳар бош архитектори Ш.Бўронов, Давлат кадастрлари палатаси Қарши шаҳар филиали бошлиғи М.Хушов ва бошқалар билан шаҳар ҳудудидаги ер майдонлари ва бошқа инфратузилма объектларини ноқонуний равишда сохта ҳужжатлар асосида бериш ҳақида олдиндан жиноий тил бириктириб, 2018—2019 йиллар давомида 54 та ҳолатда умумий қиймати 60 миллиард 512 миллион бўлган жами 463,212,13 метр/кв ер участкаларини ўз кучини йўқотган Вазирлар Маҳкамаси қарорлари ёки бошқа сохта маълумот, ёзувлар киритиб тайёрланган далолатномаларга асосан, аукционсиз ноқонуний ер ажратиш тўғрисида қарорлар қабул қилиб талон-торож қилган, — дейилади вилоят прокуратураси хабарида.

Суднинг мазкур ажримига нисбатан Қарши шаҳар прокурори томонидан вилоят судининг Жиноят ишлари бўйича апелляция инстанциясига апелляция тартибида протест келтирилди. Жиноят ишлари бўйича вилоят судининг якуний тўхтамидан кейин жиноят иши бўйича қўшимча равишда тегишли муносабат билдирилади, — дейилади прокуратура муносабатида.