Toshkent viloyatining Zangiota tumani hokimi o‘rinbosari Xayrulla Xo‘jamqulov yerosti yo‘li qurilishidagi muammolar sabab ishdan olindi. Bu haqda viloyat hokimligi axborot xizmati xabar berdi.
Ma’lum qilinishicha, viloyat hokimi Zoir Mirzayev yer soti yo‘li qurilishining to‘xtab qolishiga sabab sifatida ko‘rsatilgan “snos” muammolarini o‘rganish maqsadida Zangiota tumanida bo‘lgan.
Faqat davlat yomon ko‘rinishi kerakmi, nega ish to‘xtab qolgan? Odatda “snos” muammosi hal qilinmasdan turib, ish boshlanmaydi-ku. “Snos” muammosini hech qachon tumanning o‘zi hal qilolmaydi. Nega viloyatga murojaat qilmadingiz, “snos” bo‘yicha mas’ul bor. Menimcha, sizlarda ishni tugatishga xohish kam. Qo‘lingizdan kelmasa, aytmaysizmi?, — deydi viloyat rahbari voqea joyiga borib mas’ullar bilan gaplashar ekan.Zoir Mirzayev qurilish buyurtmachilari va bajaruvchilari bilan suhbatlashar ekan, bir oy ichida ularning qurilishiga xalal berayotgan muammolar, “snos” masalasini hal qilishini aytadi.
Qo‘shimcha qilinishicha, Xayrulla Xo‘jamqulov tuman hokimining qurilish masalalari bo‘yicha o‘rinbosari lavozimida ishlagan.
Men bu masala yuzasidan tuman hokimiga ham chora ko‘raman, — deydi viloyat rahbari Zoir Mirzayev.Avvalroq tumandagi yerosti yo‘li qurilishining to‘xtab qolishi jamoatchilik muhokamasiga sabab bo‘lgani, shu bois Toshkent viloyati hokimligi matbuot anjumani tashkil qilib, OAV vakillarini qiziqtirgan savollarga javob bergani xabar berilgandi. Mazkur matbuot anjumanida so‘z olgan buyurtmachi va quruvchilar ish to‘xtab qolishiga “snos” muammolari hal etilmaganini aytgan bo‘lsa, viloyat hokimligi mas’uli qurilishning to‘xtab qolishi faqat bunga bog‘liq bo‘lmaganini bildirgandi.
Izoh (0)