Британия ҳарбий разведкасининг маълум қилишича, 2022 йилнинг февралида Украинага босқин бошланган пайтда Россия қўшинларининг оператив қўмондонлиги учун масъул бўлган беш генералдан тўрт нафари аллақачон истеъфога юборилган. Бу ҳақда Британия Мудофаа вазирлигининг Twitter’да чоп этилган кундалик разведка маълумотида айтилади.
Британия ҳарбийларининг фикрича, ишдан бўшатилган генералларнинг ўрнига келган командирлар «Россиянинг жанговар ҳаракатларини яхшилаш учун бугунги кунгача ҳам кўп иш қилмаган». Разведка маълумотида ишдан бўшатилган рус генералларининг исмлари кўрсатилмаган.
Британия Мудофаа вазирлиги ўз шарҳида Украинадаги «махсус операция» учун масъул бўлган Россия ҳарбий раҳбарияти ўз вазифаларини тобора ёмонроқ бажараётганини таъкидлади. Тактик даражада «янги сафарбар қилинган ҳарбийларни уюштириш ва бошқариш учун ўқитилган кичик офицерларнинг етишмаслиги кўпроқ сезилмоқда», дейилади разведка маълумотида.
Британия разведкасининг фикрига кўра, кичик офицерлар даражасидаги ёмон қўмондонлик, «Россия қуролли кучларининг кўп қисмларида шижоати паст ва заиф бўлинмаларнинг бирлашувини кучайтириши мумкин».
8 октябрь куни Россия Мудофаа вазирлиги Украинадаги Россия қўшинларининг янги қўмондони этиб генерал Сергей Суровикинни тайинлаган эди. Шу тариқа Россия Мудофаа вазирлиги Украинага босқин бошланганидан бери биринчи марта қўшинларга қўмондонлик қилган шахснинг исмини ошкор қилган.
Изоҳ (0)