Тошкент шаҳридаги Малика бозори қаршисида дарахтлар ости бетонлаб кетилганига доир хабарлар тарқалди.
Хабарга «тегишли ташкилотлардан дарахтларни остини очиб сақлаб қолишда амалий ёрдам сўраймиз. Ҳар ҳолда дарахтлар яшнаб турибди. Улар қуриб қолса яна ўзимизга қийин», — дея изоҳ берилган.
«Дарё» мухбири ушбу ҳолатни ўрганиш учун видеода кўрсатилган жойга етиб борди. Ушбу видеода ҳақиқатан ҳам дарахтлар ости бетонланганига гувоҳ бўлиш мумкин.
Ҳолатга аниқлик киритиш мақсадида Давлат экология қўмитаси матбуот хизмати билан боғландик. Қўмита матбуот котиби Исматулла Дўстмуродов тегишли чора-тадбирлар кўрилаётганига қарамай, бу каби ҳолатлар тугамаётгани, ҳар бир муаммони жойида тезкорлик билан бартараф этишга қўмита доим ҳам вақт топа олмаётгани, фуқаролар, ташкилот мутасаддилари, тадбиркорлар бундай ҳодисаларни ўз ташаббуси билан тўхтатишга ҳаракат қилиши, экомаданиятни, табиатга, дарахтларга нисбатан яхши муносабатни оила, мактаб, боғчадан шакллантиришга эътибор қаратиш муҳимлигини таъкидлаб, Малика бозори рўпарасидаги ушбу ҳолатга айнан ким томонидан йўл қўйилгани бўйича аниқ маълумотга эга эмаслигини билдирди.
Матбуот котибидан Тошкент шаҳар экология ва атроф-муҳитни муҳофаза қилиш бошқармаси ҳузуридаги Юнусобод туман маркази телефон рақамини олдик ва қайта-қайта қўнғироқ қилишимизга қарамай, боғланишнинг иложи бўлмади.
Бироздан сўнг бизга қўнғироқ қилиб, ўзини Юнусобод тумани ободонлаштириш бошқармаси бошлиғининг биринчи ўринбосари дея таништирган Умидхўжа Умархўжаев тез орада бошқарма ходимлари воқеа жойига етиб бориб дарахтлар остидаги бетонни очишлари ва жараён акс этган тасвирларни бизга етказишларини маълум қилди.
Ҳолат айнан қаерда содир этилганини билиш учун биз билан боғланган халқ назорати бўйича ижрочи Турсунбой Аҳмедов эса ҳозир ёмғир ёғаётгани, ҳаво бироз очилгач, дарахтларнинг тагидаги бетонни кўчириб ташлашларини, агар бугун ёғингарчилик давом этса, узоғи билан эртага чора кўрилиб, унинг далили сифатида фото ҳамда видео тасвирларни бизга жўнатишини айтди.
Изоҳ (0)