Ўзбекистоннинг Саудия Арабистонидаги элчиси Улуғбек Мақсудов Ислом ҳамкорлик ташкилоти (ИҲТ) бош котибининг гуманитар, маданий ва ижтимоий масалалар бўйича ўринбосари Тарик Бахит билан учрашув ўтказди, деб хабар қилмоқда «Дунё» ахборот агентлиги.
Қайд этилишича, учрашув давомида томонлар 2023 йилнинг баҳорида Самарқанд шаҳрида Мусулмон ёшлари форумини ўтказиш масалаларини муҳокама қилди.
Тарик Бахитнинг таъкидлашича, бугунги кунда Ўзбекистон жаҳон ҳамжамияти томонидан йирик сиёсий, иқтисодий, илмий, маданий ва бошқа тадбирларни юқори ташкилий ва асосли даражада ўтказиш бўйича халқаро марказ сифатида эътироф қозонди. У жорий йил 26 июль куни Тошкентда бўлиб ўтган «Афғонистон: хавфсизлик ва иқтисодий ривожланиш» халқаро конференциясидаги иштирокини қайд этди. Тарик Бахит анжуман Афғонистондаги вазиятни барқарорлаштириш ва мамлакатнинг низодан кейинги тикланиши учун мазмунли, мажмуавий ва мувофиқлаштирилган ёндошувларни ишлаб чиқишга улкан ҳисса қўшганини таъкидлади.
«У ИҲТга аъзо давлатлар иштирокида Ўзбекистонда Мусулмон ёшлар форумини ўтказиш ташаббусини қўллаб-қувватлар экан, лозим бўлса уни ташкил этишда кўмаклашишга тайёр эканлигини маълум қилди», — дейилади хабарда.
Изоҳ (0)