Berlin Rossiyadan yetkazib berish to‘xtatilgandan so‘ng o‘zining energiya zaxiralarini diversifikatsiya qilmoqchi bo‘lganligi sababli Fransiya birinchi marta Germaniyaga to‘g‘ridan-to‘g‘ri tabiiy gaz yetkazib berishni boshladi. Bu haqda Fransiyaning GRTGaz gaz operatoriga tayanib, Associated Press xabar bermoqda.
GRTGaz’ning xabar berishicha, Fransiya chegarasidagi Obergheilbach qishlog‘ida ikki mamlakatni bog‘laydigan gaz quvuri dastlabki sutkalik quvvati 31 GVt/soatni yetkazib bera boshlagan.
Ta’minotlar kuniga 100 GVt/soatgacha oshishi kutilmoqda, bu Germaniyaning umumiy gaz iste’molining 2 foizidan kamini tashkil qiladi.
Germaniya Federal tarmoq agentligi rahbari Klaus Myuller Twitter’da GRTGaz’ga minnatdorlik bildirdi va Fransiya gazining Saar federal davlati orqali yetkazib berilishi Germaniyaga yetkazib berish xavfsizligini ta’minlashini ta’kidladi.
Germaniyaning gaz omborlari hozirda deyarli 95 foizga to‘lgan bo‘lsa-da, rasmiylarning aytishicha, fuqarolar bu qishda ham gazni tejashlari kerak.
Fransiyaning harakatlari Germaniya va boshqa Yevropa davlatlari Rossiyadan arzon tabiiy gaz yetkazib berishni cheklab qo‘ygandan keyin gaz importini diversifikatsiya qilishga intilayotgani bilan bog‘liq.
Izoh (0)