Жаҳон иқтисодиётидаги муаммолар доллар курсининг кучайиши билан эмас, балки алоҳида мамлакатларда иқтисодий ўсишнинг йўқлиги билан боғлиқ. Бу ҳақда АҚШ президенти Жо Байденнинг интервьюсига таяниб, «РБК» хабар бермоқда.
Мен долларнинг мустаҳкамланишидан хавотирда эмасман. Муаммо бошқа мамлакатларда иқтисодий ўсиш ва оқилона сиёсатнинг йўқлигида, — деди Байден.
У бошқа мамлакатларда инфляция билан боғлиқ вазият АҚШдагидан ёмонроқ, деб ҳисоблашини таъкидлади.
АҚШ Федерал Меҳнат статистикаси бюроси маълумотларига кўра, сентябр ойида инфляция йиллик ҳисобда 8,2 фоиз бўлган.
Аввалроқ Халқаро валюта фонди (ХВФ) доллар курсининг кучайиши дунёнинг деярли барча мамлакатларига салбий таъсир кўрсатиши ҳақидаги хулосаларини тақдим этганди.
Доллар 2000 йилдан бери энг юқори кўрсаткичга етди ва йил бошидан буён иенага нисбатан 22 фоизга, еврога нисбатан 13 фоизга ва ривожланаётган бозор валюталарига нисбатан 6 фоизга ошди.
Бу деярли барча мамлакатлар учун муҳим макроиқтисодий таъсирга эга, чунки доллар халқаро савдода энг кўп қўлланиладиган валютадир, — деди Халқаро валюта фонди.
ХВФ маълумотларига кўра, 2000 йилдан бери АҚШнинг жаҳон товар экспортидаги улуши 12 фоиздан 8 фоизга тушган бўлса, долларнинг жаҳон экспортидаги улуши қарийб 40 фоизни ташкил этади. Кўпгина мамлакатлар учун бу ўсиб бораётган инфляцияга қарши курашни қийинлаштирди.
Доллар курсининг кучайиши Россиядан бир қатор товарлар импортига қарши санкциялар фонида юзага келган энергетика инқирози билан боғлиқ.
Изоҳ (0)