Turkiya shimolidagi Bartin konida portlash sodir bo‘lib, so‘nggi ma’lumotlarga ko‘ra, 28 kishi halok bo‘ldi. Bu haqda sog‘liqni saqlash vaziri Faxriddin Xojaga tayanib, CNNTürk xabar bermoqda.
Bartin gubernatori Nurtach Arslan ma’lum qilishicha, toshko‘mir ishlab chiqaruvchi “Amasra” korxonasining 300 m chuqurlikda joylashgan konida 14-oktabr kuni taxminan 18:15 da qisman portlash yuz bergan. Ayni paytda voqea joyida qidiruv-qutqaruv jamoalari ish olib bormoqda.
58 nafar ishchi qutqarib olingan, 11 kishi kasalxonaga joylashtirilgan. Yana 15 nafar konchi yer ostida qolmoqda.
Turkiya energetika vaziri Fatih Donmezning aytishicha, dastlabki ma’lumotlarga ko‘ra, halokatga metan portlashi sabab bo‘lgan. Ichki ishlar vaziri Sulaymon Soylu ma’lum qilishicha, favqulodda vaziyat chog‘ida konda 110 kishi, portlash sodir bo‘lgan hududda esa 49 nafar konchi bo‘lgan.
Turkiya konlaridagi eng yirik portlashlardan biri 2014-yil mayida Manisa viloyatida sodir bo‘lgan, o‘shanda 270 dan ortiq odam halok bo‘lgandi.
2017-yilda esa Turkiyaning Shirnak viloyatidagi ko‘mir konida yuz bergan portlash oqibatida olti konchi halok bo‘lgan.
Izoh (0)