Namanganda o‘quvchisini urgan o‘qituvchiga nisbatan jinoyat ishi qo‘zg‘atildi

Namangan viloyatining Davlatobod tumanida o‘quvchisini ayovsiz kaltaklagan o‘qituvchiga nisbatan jinoyat ishi qo‘zg‘atildi. Bu haqda viloyat IIB axborot xizmati xabar berdi.

Namangan shahar, Davlatobod tumani XTBga qarashli 58-sonli maktabning “geografiya” fani o‘qituvchisi 2022-yil 13-oktabr kuni soat 16:10 larda o‘zi rahbarlik qilayotgan 5-sinfga kirib, ushbu sinf o‘quvchisining xatti-harakatlaridan norozi bo‘lib, badanining turli joylariga qo‘llari bilan urib, unga tan jarohati yetkazgan. Holat Davlatobod tumani Ichki ishlar bo‘limi mas’ullari tomonidan shu kunning o‘zida nazoratga olingan hamda o‘qituvchi va o‘quvchining ota-onasi bilan suhbatlashilgan.

Mazkur holat yuzasidan Namangan shahar IIO FMB huzuridagi Tergov bo‘limi tomonidan Jinoyat kodeksining 109-moddasi 2-qismi (sog‘liqning qisqa vaqt, ya’ni olti kundan ortiq, ammo yigirma bir kundan ko‘p bo‘lmagan muddatga yomonlashuviga yoki umumiy mehnat qobiliyatining uncha uzoq bo‘lmagan muddatga yo‘qotilishiga sabab bo‘lgan qasddan badanga yengil shikast yetkazish) bilan jinoyat ishi qo‘zg‘atilib tergov harakatlari olib borilmoqda, — deyiladi viloyat IIB axborotida.

2022-yil 13-oktabr kuni Davlatobod tumanidagi 58-sonli maktab o‘qituvchisi o‘zi rahbarlik qilib kelayotgan 5-“V” sinf o‘quvchisi boshqa o‘qituvchilarning dars vaqtida o‘zining noo‘rin xatti-harakatlari bilan qolgan o‘quvchilarga xalaqit berib kelayotganligini eshitib qolgan. Tanaffus paytida uni tartibga chaqirmoqchi bo‘lganida, o‘quvchi sinf rahbarini mensimasdan gap qaytargan. Shundan so‘ng, o‘qituvchi jahl ustida o‘quvchining badanini turli joylariga bir necha marotaba urib, unga tan jarohati yetkazgan, — deyiladi Bosh prokuratura axborot xizmati rahbari xabarida.