Namangan viloyatining Davlatobod tumanida 58-maktab o‘qituvchisi o‘quvchisini ayovsiz kaltakladi. Viloyat IIB axborot xizmati mazkur holatga e’tibor qaratib, voqea yuzasidan tergovga qadar tekshiruv harakatlari boshlanganini ma’lum qildi.
Mazkur voqea haqida yozgan Xalq ta’limi vazirligi axborot xizmati rahbari Laylo Rustamova blogerlarga murojaat qilib, o‘qituvchini vahshiylikda ayblashdan avval asl holatning tagiga yetish kerakligini uqtirdi.
Hurmatli blogerlardan o‘qituvchini qoralab, “vahshiy” deb atashdan avval holatning tagiga yetishni maqsadga muvofiq deb sanaymiz. Bolalar o‘rtasida yuzaga kelayotgan turli tarbiyasizlikka aynan befarqlik va loqaydlik sabab bo‘lmoqda. Shu bois o‘qituvchini qoralashdan oldin yaxshilab mulohaza qilib ko‘ring, — dedi Laylo Rustamova Telegram’dagi rasmiy kanalida.
Xalq ta’limi vazirligi axborot xizmati rahbarining mazkur chiqishi jamoatchilik, xususan jurnalistlar muhokamasiga sabab bo‘lmoqda.
Jurnalist Barno Sultonova vazirlik mas’ulining bu chiqishiga javoban shunday deydi: “Siz Amerikaning Filadelfiyasi maktabida shunaqa fikrlasangiz, o‘quvchining o‘zi peshonangizdan otardi. Butunlay jinoyat botqog‘idagi o‘sha Filadelfiyadagi maktabning direktori sizni otish kerak degan o‘quvchilarga ‘men seni yaxshi ko‘raman, sening zo‘r o‘quvchi bo‘lishingga ishonaman’, deb maktabning qora ro‘yxatidan chiqargan ekan. Bu haqida post qo‘yganman. Laylo Rustamova ta’limda sizdek bolani yaxshi ko‘rmayotganlar ishlayotgani achinarli”.
Mazkur izohga javob bergan Laylo Rustamova “Men holatni oqlaganim yo‘q. Bu harakatni vahshiy deb atashga shoshilmang, ikkinchi tomonni ham eshiting dedim. Munosib o‘qituvchi ta’limdagi bugungi holatni ko‘rib maktabga kelmaydi. Bolalar betarbiyaligida ota-ona emas o‘qituvchi aybdor bo‘lib qolyapti. Lekin o‘qituvchiga bolaga ortiqcha gap gapirishga yo‘l qo‘yilmayapti. Biror gap gapirib ko‘rsin o‘qituvchi ota-ona maktabni boshiga ko‘taradi. Xo‘sh, nima qilish kerak? O‘qituvchi ham maktabda ota-ona. Agar bola otasini so‘ksa yoki sensirasa ota-ona qanday yo‘l tutadi? Yana aytaman men urganini yoqlamayapman, shunchaki o‘qituvchining ham o‘z haqiqati bor uni ham eshitish kerak. Men bolani nega yaxshi ko‘rmayman?! Lekin o‘qituvchi xor bo‘lgan jamiyatimizda ularning battar xor bo‘lishini istamayman. Bolalarning tarbiyasi, afsuski tashlab qo‘yilgan. Istaganini qilyapti ular”, — dedi.
Jurnalist Nurulloh Sha’rif “Menda pedagoglik diplomi bor-da, o‘qituvchini oqlaganlarning bolasini birma bir xuddi shunday kaltaklasam, mening ham yonimni olisharmikin?”, deydi. Bu gapga javob bergan Laylo Rustamova “Men o‘qituvchi bekorga bunday qilmaganiga 100 foiz ishonchim komil. Ertaga sinfda yoki maktabda bilganini qilib o‘tirgan o‘quvchi chiqsa o‘qituvchi qayerga qarayapti deb chiqishni bilamiz, lekin qilgan yomonligi uchun jazolanganida vahshiy deymiz. Men o‘qituvchi 100 foiz haq demadim, lekin o‘quvchi shu holatni atayin keltirib chiqargan bo‘lsa ham hayron bo‘lmayman”, — dedi. Vazirlik mas’ulining gapini qo‘llab-quvvatlagan yana bir jurnalist Nizomjon Islomov “Agar bu yerda o‘quvchining aybi bo‘lsa, o‘qituvchini qoralamayman. Biz maktabda bundan battar kaltaklarni yeganmiz. Zato o‘qituvchidan qo‘rqardik, aytganini qilardik, hurmat qilardik. Hozirgi o‘quvchilar esa bir tiyinga olmaydi”, — deb yozadi.
Ushbu munozarani kuzatib turgan Facebook foydalanuvchisi Murodilla Mixliyev vazirlik mas’ulining bu gapiga javoban “Bu opajonimizning bolasini shunday kaltaklab ko‘rish kerak. Keyin anglaydi”, — desa, fotomuxbir Nozim Abdulla “O‘qituvchining ishi vahshiylik, uning yonini olganlarni ham vahshiy deb hisoblayman”, deydi.
Bobur Yo‘ldoshev ismli Facebook foydalanuvchisi “Nima bo‘lganda ham bolani kaltaklash xato, ish kaltaklash bilan hal qilinadigan bo‘lsa, uni aql bilan bitiradiganlarga topshirish kerak”, — desa, “Ma’rifat” gazetasi bosh muharriri Husan Karvonli “O‘qituvchi bir shappat ursin, boring ikki shappat ursin. Buni ko‘rdingizmi o‘zi? Holatni yuz kun o‘rgansangiz ham bir gramm ham oqlab bo‘lmaydi”, — deydi.
Yulduz Xoliqova ismli Facebook foydalanuvchisi esa Laylo Rustamovaga murojaat qilib, “Bolaning ota-onasi o‘rniga o‘zingizni qo‘yib ko‘ring. O‘rnida sizning bolangiz bo‘lsa ham shunday dermidingiz? Hatto oilada ham bolaga zo‘ravonlik ishlatilmasin deyapmiz. Shu holatda o‘qituvchini oqlashga qanday asos ko‘ryapsiz? Nima sabab bo‘lgan taqdirda ham uning bolaga bu darajada azob berishga qanday haqqi bor? O‘qituvchining gavdasini qarang, bolaning gavdasini qarang. Ikkalasining vazni, kuchi tengmi? Mana shu kaltaklashda bir urib o‘ldirib qo‘ysa nima bo‘ladi? Bu erkak agar oilali bo‘lsa xotinini ham, bolasini ham shunday kaltaklashdan qaytmaydi deb kim kafolat beradi? Shumi o‘qituvchi, pedagog? Qanday asos bo‘lgan taqdirda ham hech kim bu ‘o‘qituvchi’ga bolaga jismoniy zo‘ravonlik qilishiga huquq bermagan. ‘Sabab bordir’, debsiz. Sabab bor, albatta. Bu holatda bo‘lmasligi mumkin emas. Agar shu o‘qituvchi pedagoglik mahoratini egallaganida nima sabab bo‘lgan taqdirda ham jahlini jilovlab, bolani sudrab direktor xonasiga olib borib, ota-onasini chaqirtirishga aqli yetgan bo‘lardi. G‘azabini jilovlash qo‘lidan kelmaydigan, jahl otiga minganida ko‘ziga hech narsa ko‘rinmaydigan ruhiy kasalmi-u? Pedagog bo‘lsa, bolaning keyingi taqdiriga javobgar bo‘lsa, avvalo o‘zining ruhiy holatiga javob bersin. Kuchini bolani ushlab turishga ishlatib ota-onasini chaqirtirsin, direktorga olib borsin. Sal qolsa o‘ldirib qo‘yadigan qilib urmasin”, deydi.
Tarmoq foydalanuvchisi Muzaffar Sayfiddinov ham Laylo Rustamovaning bu chiqishiga javoban “Siz kabilar tufayli bo‘ladi bunday holatlar. Uzi aybdor bo‘lsa kerak deb oqlaganlar ushbu chala-pedagoglarga kuch ishlatishga ruxsat berganday bo‘ladi. Nafaqat pedagog, balki o‘z ota-onasi ham qo‘l ko‘tarmasligi kerak bolaga. Nima qilishining farqi yo‘q. Nima qilgan taqdirda ham u kuch ishlatishga sabab bo‘la olmaydi”, — deydi.
Bloger Mufasa vazirlik mas’uliga murojaat qilib, “Agar bu bola o‘zini joniga qasd qilsa-chi? Shunda ham o‘qituvchiga advokatlik qilib o‘tirasizmi?”, — deb savol berdi, biroq savol ochiq qoldi.
Yana bir jurnalist Mirolim Isajonov “Rostdan o‘zidan o‘zi urmaydi-ku odam odamni. Matbuot kotib sifatida holatning tagiga yetish kerak deyapti. Bu gapni deyarli hamma matbuot kotib har qanaqa holatga nisbatan ishlatadi. Ammo o‘qituvchi o‘quvchini ayamay urgani achinarli”, — deydi.
“Daryo” mazkur mavzu yuzasidan bo‘layotgan muhokamalarni kuzatishda davom etadi.
Izoh (0)