Toshkent viloyatining Zangiota va Bo‘ka tumanlarida dori vositalarining noqonuniy muomalaga kiritilishining oldi olindi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Zangiota tuman bo‘limi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro A.A. dori vositalarini dorixonalardan tashqarida muomalaga kiritish orqali daromad orttirishni ko‘zlab, fuqaro I.ga tegishli hujjatlari bo‘lmagan 3 turdagi 9 304 quti “Azedsin 250”, 7 068 quti “Azedsin 500”, 6 000 dona “Tevartem” nomli xorijda ishlab chiqarilgan dori vositalarini jami 17 330 dollarga sotgan vaqtida ashyoviy dalillar bilan ushlangan.
Shuningdek, departamentning Bo‘ka tuman bo‘limi tomonidan o‘tkazilgan tezkor tadbirda G.Sh. MCHJ rahbari A.S. ushlangan. U fuqaro S.ga tuman markazidagi avtomobillar yuvish shoxobchasi oldida yaroqlilik muddati o‘tgan 408 dona “Remdesivir” hamda 326 dona “Remdesivir Jubi-R” nomli jami 734 dona dori vositalarini 11 000 dollarga sotayotgani aniqlangan.
Mazkur holatlar yuzasidan Jinoyat kodeksining 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish, shuningdek, dori vositalarini dorixonalardan va ularning filiallaridan tashqarida realizatsiya qilish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)