“O‘zkimyoimpeks” kompaniyasi firibgarlik haqida ogohlantirmoqda

Bolgariya kompaniyasi tomonidan “O‘zkimyoimpeks” MCHJ hamda “BJ Platinum Sp. z.o.o.” (Polsha) kompaniyalari o‘rtasida shartnoma mavjud yoki mavjud emasligini bilish maqsadida murojaat qilingan. Ma’lum bo‘lishicha, Bolgariya kompaniyasi vakillari bilan suhbat davomida ularga soxta shartnoma va tovarlarni jo‘natish uchun soxta hisob-fakturalari taqdim etilgan.

Xabarga ko‘ra, Bolgariya kompaniyasi “BJ Platinum Sp. z.o.o.” kompaniyasining hisob raqamiga oldindan to‘lovni ham amalga oshirgan. “O‘zkimyoimpeks” MCHJ hamda Polsha kompaniyasi o‘rtasida shartnoma tuzilmagan. Sababi kontragentni tekshirish mobaynida shartnomani ikki yoki undan ortiq kompaniyalarga qayta sotish kabi firibgarlik operatsiyalari bilan bog‘liq adolatsiz munosabatlar aniqlangan. Shu bilan birga, “BJ Platinum Sp. z.o.o.” kompaniyasi kimyoviy mahsulot shartnomasi uchun hech qachon pul to‘lamagan.

Shuningdek, ayrim shaxslar o‘zini “O‘zkimyoimpeks” MCHJ vakili sifatida tanishtirib, ma’lum bir to‘lov evaziga o‘z xizmatlarini (konsalting) taklif qilishi yoki akkreditiv sifatida xizmat ko‘rsatishni taklif qilish holatlari tez-tez uchrab turibdi.

“O‘zkimyoimpeks” MCHJ kimyoviy mahsulotlarni shartnomada ko‘rsatilgan joriy hisob raqamiga 100 foiz oldindan to‘lov amalga oshirilgandan so‘ng yetkazib beradi. Shu munosabat bilan “O‘zkimyoimpeks” MCHJ vakillari bilan faqatgina office@ukie.uz elektron manzili yoki +998909210400 telefon raqami orqali bevosita muloqot qilishingiz tavsiya qilinadi, — deyiladi xabarda.