Ijtimoiy tarmoqlarda Surxondaryo viloyati hokimi To‘ra Bobolovning lavozimidan ozod etilishi kutilayotgani aytilgan xabar tarqaldi. Viloyat hokimligi axborot xizmati mazkur xabarga munosabat bildirib, buni rad etdi.
Norasmiy manbalar tomonidan tarqatilgan xabarlarda go‘yoki Surxondaryo viloyati hokimi To‘ra Bobolovning o‘rnini bo‘shatishi aniq bo‘lgani, biroq uning o‘rniga nomzod tanlanayotgani bois jarayon biroz cho‘zilayotgani aytiladi. Bu xabarlar mutlaqo asossiz bo‘lib, vohadoshlarimizdan norasmiy manbalar va ijtimoiy tarmoqlardagi bu kabi asoslanmagan yolg‘on ma’lumotlarga ishonmasliklarini so‘raymiz, — deyiladi hokimlik ma’lumotida.Hokimlik axborot xizmati shuningdek, aholi o‘rtasida yolg‘on axborot tarqatganlik uchun javobgarlik borligini eslatgan.
Avvalroq Bobolovga tegishli ekani aytilgan audioyozuvlar tarqalgach, Prezident adminstratsiyasi rahbari Sardor Umrzoqov hokim prezident qarori bilan o‘z faoliyatini davlat siyosati va amalga oshirilayotgan islohotlarga mos ravishda tashkil etmagani, hokimlarga qo‘yiladigan talablarga rioya etmasdan, majlis qatnashchilarini haqorat qilgani va bu bilan keng jamoatchilikning noroziligiga sabab bo‘lgani uchun jazolanganini aytib, “To‘ra Bobolov, siz o‘rnak bo‘lmayapsiz. Internetda chiqqan gaplarni montaj dedingiz. Lekin ekspertiza sizning ovozingizni tasdiqladi. Prezidentimiz topshirig‘i bilan sizga intizomiy jazo chorasi sifatida oylik ish haqining 40 foizi miqdorida jarima qo‘llandi”, — degandi.
Izoh (0)