Adliya vazirligida 14-oktabr kuni “Ayollarga huquqiy madad” amaliy qo‘llanmasining taqdimoti bo‘lib o‘tdi. Tadbirda Oila va xotin-qizlar davlat qo‘mitasi, Ayollarni reabilitatsiya qilish va moslashtirish respublika markazi, ayollar sohasida faoliyat yurituvchi nodavlat-notijorat tashkilotlari va OAV vakillari ishtirok etdi.
Qo‘llanma Konrad Adenauer fondining O‘zbekistondagi vakolatxonasi ko‘magida Adliya vazirligi qoshidagi “Adolat” milliy huquqiy-axborot markazi” tomonidan nashr etildi. Qo‘llanma mualliflari Adliya vazirligi mutaxassislari Shahnoza Soatova va F.Tojiyev hisoblanadi. Unda nikoh va oila, fuqarolik masalalari, ta’lim, mehnat, sog‘liqni saqlash, ijtimoiy himoya kabi sohalardagi asosiy huquqiy hujjatlar haqida ma’lumotlar berilgan.
Jumladan, qo‘llanmada keltirilgan hujjatlar xotin-qizlarning kundalik hayotidagi dolzarb masalalarga taalluqlidir. Qo‘llanmani o‘qib, xotin-qizlarning shaxsiy, siyosiy, iqtisodiy va ijtimoiy huquqlariga oid savollariga javob olish mumkin.
Undagi huquqiy hujjatlarni elektron formatda O‘zbekiston qonunchilik ma’lumotlari milliy bazasi – Lex.uz saytida topish mumkin. Biroq yaqinda e’lon qilingan YUNICEFning hisobotiga ko‘ra, O‘zbekistonda internetdan hech qachon foydalanmagan 14–30 yoshli qizlarning ulushi 68 foizni tashkil etadi. Shuni inobatga olgan holda qo‘llanmaning nashr etilishi kitobxonlar doirasini sezilarli darajada kengaytiradi, chunki uni “Ayollar daftari” va “Yoshlar daftari”ga kiritilgan xotin-qizlarga bepul tarqatish rejalashtirilgan.
Yuqoridagi qo‘llanmaning nashr etilishi 2022—2026-yillarga mo‘ljallangan O‘zbekistonning taraqqiyot strategiyasida (69-maqsad: Xotin-qizlarni qo‘llab-quvvatlash va ularning jamiyatdagi faolligini yanada oshirish) belgilangan vazifalarni amalga oshirishga xizmat qiladi.
Izoh (0)