Bandlik va mehnat munosabatlari vaziri Nozim Husanov hamda O‘zbekistonning Yaponiyadagi favqulodda va muxtor elchisi Muhsinxo‘ja Abdurahmonov yaponiyalik ish beruvchilar bilan suhbatlashib, O‘zbekistonning mehnat bozori haqida ma’lumot berdi. Bu haqda “Daryo”ga vazirlik axborot xizmati rahbari Mavjuda Mirzayeva ma’lum qildi.
Ta’kidlanishicha, Bandlik va mehnat munosabatlari vaziri Nozim Husanov boshchiligidagi delegatsiya ayni paytda Yaponiya poytaxti Tokio shahrida bo‘lib turibdi.
Delegatsiya vakillari Tokio shahrida dastlab Shimizu corporation kompaniyasi bilan muzokara o‘tkazdi. Mazkur kompaniya arxitektura, qurilish va bosh pudratchi firma hisoblanib, kompaniyaning yillik savdosi taxminan 15 milliard dollarni tashkil etadi. Tashkilot dunyodagi eng yaxshi yigirmata pudratchilardan biri sifatida tan olingani bois, kompaniya mas’ullariga O‘zbekistonning mehnat bozori ishchilari haqida ma’lumot berildi. Va ishchi kuchi taklif qilindi, — deydi vazirlik axborot xizmati rahbari Mavjuda Mirzayeva.Vazirlik axborot xizmatining eslatishicha, O‘zbekiston dunyoda Yaponiyaga ishchi kuchi olib kirish imkoniyatiga ega o‘n birinchi davlatga aylangan. Endi o‘zbek migrantlari Yaponiyada ham mehnat qilib, daromad topishni boshlagan.
Ta’kidlanishicha, kunning ikkinchi uchrashuvi JITCO kompaniyasi rahbariyati bilan o‘tkazilgan bo‘lib, muloqotda Yaponiyadagi kompaniyalarga xorijdan, xususan O‘zbekistondan texnik stajyor va malakali ishchilarni jalb qilish, shuningdek, xalqaro iqtisodiyot va jamiyatni rivojlantirishga qaratilgan harakatlarda ko‘mak so‘ralgan.
Qo‘shimcha qilinishicha, delegatsiya vakillari “Chet ellik texnik stajyorlar malakasini oshirish tashkiloti” rahbariyati bilan ham muzokara o‘tkazgan. Unda tashkilot bilan o‘zbekistonlik stajyorlarini tashkilotga jalb qilish va kunchiqar mamlakatdagi mehnat migrantlarini huquqiy, ijtimoiy himoyalash masalalarida rejalar tuzilgan. Aytilishicha, tashkilot texnik stajyorlarga bilim olish, tajriba orttirib, ko‘nikma egallashda yordamlashish maqsadida 2800 dan ziyod ish beruvchi assotsiatsiya va 60 ming ish beruvchi faoliyatini nazorat qiladi.
Avvalroq o‘zbekistonlik ishchilarning aksariyati hali yapon tilini mukammal bilmaganligi uchun ularga asosan qariyalarni parvarishlash va qishloq xo‘jaligida mehnat qilishga takliflar bo‘layotgani, davlat homiyligida o‘qitilayotgan ishchilar kelajakda boshqa ish o‘rinlarini ham band etishi ko‘zda tutilgani xabar berilgandi.
Izoh (0)