“Daryo” nashri 14-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
“Hamma butunlay umidsizlikka tushgan. Kayfiyat juda yomon”. Rossiyalik mansabdor va biznesmenlar hokimiyat almashishini kutmoqda
Rossiya qo‘shinlari tomonidan Ukraina bo‘ylab yoppasiga raketa zarbalari berilishi fonida rossiyalik mansabdorlar va biznes vakillarining bir qismi “tushkunlikka tushgan va g‘amgin kayfiyatda”, ular mamlakatda iqtisodiy va siyosiy vaziyat yomonlashishini kutmoqda. Bu haqda “Rossiya elitasi”ning yuqori mansabli vakillari anonimlik sharti bilan The Washington Post gazetasiga ma’lum qilgan.
The Washington Post suhbatdoshlari so‘zlariga ko‘ra, agar zarbalar orqali Ukraina energiya tizimiga zarar yetkazishga muvaffaq bo‘linsa va jangovar harakatlar qishga cho‘zilsa ham, o‘qqa tutishlarni davom ettirish uchun Rossiyaga raketalar yetmay qolishi mumkin. Mansabdorlardan biri ma’lum qilishicha, raketalar ishlab chiqarilmoqda, biroq zaxiralar tugab bitish arafasida turibdi, yangilari esa sanoqli miqdorda chiqarilmoqda.
“Status-kvo (hozirgi vaziyat) hech kimni qoniqtirmayapti. Harbiy yoki siyosiy g‘alaba ilojsiz ekanligi tushunarli. Ammo mag‘lubiyat ham imkonsiz. Bu xuddi shaxmat o‘yinidagi kabi sugsvangga aylanmoqda — har bitta qadam avvalgisidan yomonlashib bormoqda, biroq hech narsa qilib bo‘lmaydi”, — dedi amaldorlardan biri gazetaga.
Ilon Mask Ukrainaga Starlink yetkazib berishni ortiq moliyalashtira olmaydi. SpaceX Pentagondan buni zimmasiga olishni so‘ragan
SpaceX sentabr oyida Pentagonga maktub yo‘llab, uni Ukrainadagi Starlink sun’iy yo‘ldosh tarmog‘ini moliyalashtirishni to‘xtatishi mumkinligi haqida ogohlantirgan. Bu haqda CNN xabar bermoqda. Kompaniya Pentagondan xarajatlarni qoplashni so‘ragan.
Maktubdan ma’lum bo‘lishicha, Ukrainadagi sun’iy yo‘ldosh stansiyalarining qariyb 85 foizi Buyuk Britaniya, AQSH va Polsha kabi davlatlar tomonidan moliyalashtirilgan. Xususan, AQSH Xalqaro taraqqiyot agentligi (USAID) Ukrainadagi Starlink uskunalari va xizmatlariga qariyb 3 million dollar sarflagan. Deyarli 9 mingta stansiya Polsha tomonidan, 1,7 mingtasi AQSH hukumati tomonidan moliyalashtirilgan.
Janubiy Koreya raketa parvozlariga javoban Shimoliy Koreyaga qarshi yangi sanksiyalar kiritdi
Shimoliy Koreya so‘nggi paytlarda tez-tez raketa uchirayotgani tufayli, Janubiy Koreya uning 15 nafar fuqarosi va 16 ta tashkilotini qora ro‘yxatga kiritdi. Bu haqda mamlakat Tashqi ishlar vazirligi xabar berdi. Bu 2017-yildan buyon Janubiy Koreya tomonidan KXDRga qarshi kiritilayotgan birinchi sanksiyalardir.
“Hukumat Shimoliy Koreya tomonidan misli ko‘rilmagan darajada tez-tez amalga oshirilayotgan va taktik yadro qurolini qo‘llashni ko‘zda tutadigan raketa provokatsiyalarini qat’iyan qoralaydi”, — deyiladi idora xabarida.
Avvalroq Kim Chen In taktik yadro bo‘linmalarining harbiy tayyorgarligini ko‘zdan kechirgan edi. Xabarlarga ko‘ra, Kim Chen In AQSH va Janubiy Koreya bilan muzokaralar olib borishdan manfaatdor emasligini ochiq aytgan.
MDH davlatlari rahbarlari jahondagi ayni vaziyatdan kelib chiqib ilgari surayotgan masalalar
Ostonada Qozog‘iston prezidenti Qosim-Jo‘mart To‘qayev raisligida o‘tkazilayotgan MDHga a’zo davlatlar rahbarlari kengashining tor tarkibdagi yig‘ilishidagi nutqida oson bo‘lmagan geoiqtisodiy sharoitlarda alohida e’tibor hamdo‘stlikning iqtisodiy salohiyatini mustahkamlashga va, avvalambor, 2030-yilgacha MDHni iqtisodiy rivojlantirish strategiyasi nizomlarining bajarilishiga qaratilganini aytdi.
O‘z o‘rnida Shavkat Mirziyoyev MDH makonida oziq-ovqat mahsulotlari to‘siqlarsiz yetkazib berilishi uchun sharoitlar yaratish haqida gapirdi. Bu o‘rinda gap Termiz—Mozori sharif—Kobul—Peshovar hamda Xitoy—Qirg‘iziston—O‘zbekiston temiryo‘llarini qurish loyihalari haqida bormoqda.
Ushbu uchrashuvda Belarus prezidenti Aleksandr Lukashenko: G‘arb butun MDH bo‘ylab provokatsiyalar tayyorlayotgani haqida gapirgan. “MDH mamlakatlari butun hamdo‘stlik bo‘ylab turli provokatsiyalarga tayyor turishi kerak, chunki har bitta davlatning chidamliligi sinovdan o‘tkaziladi”, — degan Belarus prezidenti.
Izoh (0)