«Дарё» нашри 14 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
«Ҳамма бутунлай умидсизликка тушган. Кайфият жуда ёмон». Россиялик мансабдор ва бизнесменлар ҳокимият алмашишини кутмоқда
Россия қўшинлари томонидан Украина бўйлаб ёппасига ракета зарбалари берилиши фонида россиялик мансабдорлар ва бизнес вакилларининг бир қисми «тушкунликка тушган ва ғамгин кайфиятда», улар мамлакатда иқтисодий ва сиёсий вазият ёмонлашишини кутмоқда. Бу ҳақда «Россия элитаси»нинг юқори мансабли вакиллари анонимлик шарти билан The Washington Post газетасига маълум қилган.
The Washington Post суҳбатдошлари сўзларига кўра, агар зарбалар орқали Украина энергия тизимига зарар етказишга муваффақ бўлинса ва жанговар ҳаракатлар қишга чўзилса ҳам, ўққа тутишларни давом эттириш учун Россияга ракеталар етмай қолиши мумкин. Мансабдорлардан бири маълум қилишича, ракеталар ишлаб чиқарилмоқда, бироқ захиралар тугаб битиш арафасида турибди, янгилари эса саноқли миқдорда чиқарилмоқда.
«Статус-кво (ҳозирги вазият) ҳеч кимни қониқтирмаяпти. Ҳарбий ёки сиёсий ғалаба иложсиз эканлиги тушунарли. Аммо мағлубият ҳам имконсиз. Бу худди шахмат ўйинидаги каби сугсвангга айланмоқда — ҳар битта қадам аввалгисидан ёмонлашиб бормоқда, бироқ ҳеч нарса қилиб бўлмайди», — деди амалдорлардан бири газетага.
Илон Маск Украинага Starlink етказиб беришни ортиқ молиялаштира олмайди. SpaceX Пентагондан буни зиммасига олишни сўраган
SpaceX сентябрь ойида Пентагонга мактуб йўллаб, уни Украинадаги Starlink сунъий йўлдош тармоғини молиялаштиришни тўхтатиши мумкинлиги ҳақида огоҳлантирган. Бу ҳақда CNN хабар бермоқда. Компания Пентагондан харажатларни қоплашни сўраган.
Мактубдан маълум бўлишича, Украинадаги сунъий йўлдош станцияларининг қарийб 85 фоизи Буюк Британия, АҚШ ва Польша каби давлатлар томонидан молиялаштирилган. Хусусан, АҚШ Халқаро тараққиёт агентлиги (USAID) Украинадаги Starlink ускуналари ва хизматларига қарийб 3 миллион доллар сарфлаган. Деярли 9 мингта станция Польша томонидан, 1,7 мингтаси АҚШ ҳукумати томонидан молиялаштирилган.
Жанубий Корея ракета парвозларига жавобан Шимолий Кореяга қарши янги санкциялар киритди
Шимолий Корея сўнгги пайтларда тез-тез ракета учираётгани туфайли, Жанубий Корея унинг 15 нафар фуқароси ва 16 та ташкилотини қора рўйхатга киритди. Бу ҳақда мамлакат Ташқи ишлар вазирлиги хабар берди. Бу 2017 йилдан буён Жанубий Корея томонидан КХДРга қарши киритилаётган биринчи санкциялардир.
«Ҳукумат Шимолий Корея томонидан мисли кўрилмаган даражада тез-тез амалга оширилаётган ва тактик ядро қуролини қўллашни кўзда тутадиган ракета провокацияларини қатъиян қоралайди», — дейилади идора хабарида.
Аввалроқ Ким Чен Ин тактик ядро бўлинмаларининг ҳарбий тайёргарлигини кўздан кечирган эди. Хабарларга кўра, Ким Чен Ин АҚШ ва Жанубий Корея билан музокаралар олиб боришдан манфаатдор эмаслигини очиқ айтган.
МДҲ давлатлари раҳбарлари жаҳондаги айни вазиятдан келиб чиқиб илгари сураётган масалалар
Остонада Қозоғистон президенти Қосим-Жўмарт Тўқаев раислигида ўтказилаётган МДҲга аъзо давлатлар раҳбарлари кенгашининг тор таркибдаги йиғилишидаги нутқида осон бўлмаган геоиқтисодий шароитларда алоҳида эътибор ҳамдўстликнинг иқтисодий салоҳиятини мустаҳкамлашга ва, авваламбор, 2030 йилгача МДҲни иқтисодий ривожлантириш стратегияси низомларининг бажарилишига қаратилганини айтди.
Ўз ўрнида Шавкат Мирзиёев МДҲ маконида озиқ-овқат маҳсулотлари тўсиқларсиз етказиб берилиши учун шароитлар яратиш ҳақида гапирди. Бу ўринда гап Термиз—Мозори шариф—Кобул—Пешовар ҳамда Хитой—Қирғизистон—Ўзбекистон темир йўлларини қуриш лойиҳалари ҳақида бормоқда.
Ушбу учрашувда Беларусь президенти Александр Лукашенко: Ғарб бутун МДҲ бўйлаб провокациялар тайёрлаётгани ҳақида гапирган. «МДҲ мамлакатлари бутун ҳамдўстлик бўйлаб турли провокацияларга тайёр туриши керак, чунки ҳар битта давлатнинг чидамлилиги синовдан ўтказилади», — деган Беларусь президенти.
Изоҳ (0)