Uzbekistan Airways aviakompaniyasi 7—10-oktabr kunlari o‘zbekistonlik jurnalistlar va blogerlar uchun Dubayga media-tur tashkil etdi. Media-turda “Daryo” muxbiri ham ishtirok etdi.
Dubay ilg‘or arxitekturasi, tarixi va madaniyati bilan dunyoning yetakchi sayyohlik markazlaridan biri sifatida mashhur.
Media-tur qatnashchilari dastlab shaharning eng go‘zal joylaridan biri — Jumeirah Palm orolida bo‘ldi.
Orolni yuqoridan kuzatish uchun 52 qavatli maxsus bino “The View at The Palm” kuzatuv nuqtasi qurilgan bo‘lib, uning balandligi 240 metrni tashkil etadi.
Yuqoridan pastga qaraganda palma daraxti shaklini o‘zida aks ettirgan dengiz va muhtasham binolardan iborat ajoyib kompleks kishini hayratlantiradi.
Navbatdagi sayohat manzillari “Al Fahidi” tarixiy tumani va “Shayx Muhammad bin Rashid Al Maktum” madaniyat markaziga bo‘ldi.
Foto: “Daryo”
Ishtirokchilar ushbu maskanlarda Dubay tarixi, madaniyati va me’morchiligi bilan tanishtirildi.
Shu bilan birga, arablarning milliy taomlaridan ham tatib ko‘rildi.
Media-tur davomida jurnalistlar va blogerlar “Kelajak muzeyi”da (Museum of the future) ham bo‘ldi.
Muzey ko‘rgazmalari tashrif buyuruvchilarni yaqin 50 yil ichida sodir bo‘lishi mumkin bo‘lgan dunyo o‘zgarishlari haqidagi tasavvurlar bilan tanishtiradi. Ma’lumotlarga ko‘ra, National Geographic jurnali mazkur inshootni dunyodagi eng go‘zal 14 ta muzey ro‘yxatiga kiritgan. Muzeyga sayohat yakunlangach, ishtirokchilar “Caesars Palace” mehmonxonasidagi “Venera” restoranida mazali kechki ovqat bilan mehmon qilindi.
Foto: “Daryo”
Keyingi sayohat manzili tropik yopiq o‘rmon uyi — “Yashil sayyora” (The Green Planet).
U yerda 3000 dan ortiq flora va fauna bor. O‘ziga xos o‘simliklar, qushlar va noyob hayvonlar o‘rmon atmosferasini aks ettiradi.
Shubhasiz, ishtirokchilar uchun eng yorqin taassurot qoldirgan manzillardan biri Dubay sahrosi bo‘ldi. Media-tur qatnashchilari uchun “Platinum Heritage” turizm kompaniyasi cho'l Safari sayohatini tashkil etdi.
Maxsus avtoulovda qum barxanlarini tomosha qilish, tuya minish, sahro taomlarini tanovul qilish — bularning barchasi zavqli.
Media-tur davomida Boeing kompaniyasi vakillari bilan uchrashuv ham tashkil etildi. Ular Uzbekistan Airways 1996-yilda kompaniyadan birinchi Boeing 767 samolyotini xarid qilgani va hamkorlik o‘shandan beri davom etib kelayotganini aytdi.
Ta’kidlanishicha, o‘tgan 26 yil ichida Uzbekistan Airways aviaparki Boeing kompaniyasiga tegishli 14 ta havo kemasiga ega bo‘lgan. 2021-yilning may oyida aviakompaniya oltinchi Boeing 787 Dreamliner havo kemasini qabul qilib olgan. Hozirgi kunda aviakompaniya Dubay, Nyu-York, Istanbul, Seul va Moskva kabi shaharlarga mazkur samolyotda parvozlarni amalga oshirmoqda. Bundan tashqari, Uzbekistan Airways Boeing 767 va Boeing 757 havo kemalaridan Yevrosiyo va Shimoliy Amerika mamlakatlariga yo‘lovchilarni yetkazish maqsadida foydalanadi.
Bugungi kunda Uzbekistan Airways Toshkentdan Dubay shahriga haftasiga 6-marta: dushanba, chorshanba, payshanba, juma, shanba va yakshanba kunlari muntazam aviaqatnovlarni amalga oshirmoqda.
Yana bir yangilik shuki, Farg‘ona vodiysidan parvozlarni ko‘paytirish maqsadida aviakompaniya 2022-yilning 30-oktabridan boshlab Farg‘ona—Dubay—Farg‘ona yo‘nalishi bo‘yicha yangi aviaqatnovlarni yo‘lga qo‘yadi. Parvozlar haftada 2 marta: seshanba va yakshanba kunlari amalga oshiriladi.
Aviakompaniya 2022-yilning 31-oktabridan boshlab Toshkent—Sharja—Toshkent yo‘nalishi bo‘yicha muntazam to‘g‘ridan to‘g‘ri parvozlar sonini oshirmoqda. Reyslar haftaning dushanba, payshanba va yakshanba kunlari amalga oshiriladi.
Izoh (0)