Саҳродаги мўъжизавий шаҳарга саёҳат — Uzbekistan Airways Дубайга медиа-тур уюштирди (фото)

Uzbekistan Airways авиакомпанияси 7—10 октябрь кунлари ўзбекистонлик журналистлар ва блогерлар учун Дубайга медиа-тур ташкил этди. Медиа-турда «Дарё» мухбири ҳам иштирок этди.

Дубай илғор архитектураси, тарихи ва маданияти билан дунёнинг етакчи сайёҳлик марказларидан бири сифатида машҳур.

Медиа-тур қатнашчилари дастлаб шаҳарнинг энг гўзал жойларидан бири — Jumeirah Palm оролида бўлди.

Оролни юқоридан кузатиш учун 52 қаватли махсус бино «The View аt The Palm» кузатув нуқтаси қурилган бўлиб, унинг баландлиги 240 метрни ташкил этади.

Юқоридан пастга қараганда палма дарахти шаклини ўзида акс эттирган денгиз ва муҳташам бинолардан иборат ажойиб комплекс кишини ҳайратлантиради.

Навбатдаги саёҳат манзиллари «Ал Фаҳиди» тарихий тумани ва «Шайх Муҳаммад бин Рашид Ал Мактум» маданият марказига бўлди.

Фото: «Дарё»

Иштирокчилар ушбу масканларда Дубай тарихи, маданияти ва меъморчилиги билан таништирилди.

Шу билан бирга, арабларнинг миллий таомларидан ҳам татиб кўрилди.

Медиа-тур давомида журналистлар ва блогерлар «Келажак музейи»да (Мuseum of the future) ҳам бўлди.

Музей кўргазмалари ташриф буюрувчиларни яқин 50 йил ичида содир бўлиши мумкин бўлган дунё ўзгаришлари ҳақидаги тасаввурлар билан таништиради. Маълумотларга кўра, National Geographic журнали мазкур иншоотни дунёдаги энг гўзал 14 та музей рўйхатига киритган. Музейга саёҳат якунлангач, иштирокчилар «Caesars Palace» меҳмонхонасидаги «Венера» ресторанида мазали кечки овқат билан меҳмон қилинди.

Фото: «Дарё»

Кейинги саёҳат манзили тропик ёпиқ ўрмон уйи — «Яшил сайёра» (The Green Planet).

У ерда 3000 дан ортиқ флора ва фауна бор. Ўзига хос ўсимликлар, қушлар ва ноёб ҳайвонлар ўрмон атмосферасини акс эттиради.

Шубҳасиз, иштирокчилар учун энг ёрқин таассурот қолдирган манзиллардан бири Дубай саҳроси бўлди. Медиа-тур қатнашчилари учун «Platinum Heritage» туризм компанияси чўл Safari саёҳатини ташкил этди.

Махсус автоуловда қум барханларини томоша қилиш, туя миниш, саҳро таомларини тановул қилиш — буларнинг барчаси завқли.

Медиа-тур давомида Boeing компанияси вакиллари билан учрашув ҳам ташкил этилди. Улар Uzbekistan Airways 1996 йилда компаниядан биринчи Boeing 767 самолётини харид қилгани ва ҳамкорлик ўшандан бери давом этиб келаётганини айтди.

Таъкидланишича, ўтган 26 йил ичида Uzbekistan Airways авиапарки Boeing компаниясига тегишли 14 та ҳаво кемасига эга бўлган. 2021 йилнинг май ойида авиакомпания олтинчи Boeing 787 Dreamliner ҳаво кемасини қабул қилиб олган. Ҳозирги кунда авиакомпания Дубай, Нью-Йорк, Истанбул, Сеул ва Москва каби шаҳарларга мазкур самолётда парвозларни амалга оширмоқда. Бундан ташқари, Uzbekistan Airways Boeing 767 ва Boeing 757 ҳаво кемаларидан Евросиё ва Шимолий Америка мамлакатларига йўловчиларни етказиш мақсадида фойдаланади.

Бугунги кунда Uzbekistan Airways Тошкентдан Дубай шаҳрига ҳафтасига 6 марта: душанба, чоршанба, пайшанба, жума, шанба ва якшанба кунлари мунтазам авиақатновларни амалга оширмоқда.

Яна бир янгилик шуки, Фарғона водийсидан парвозларни кўпайтириш мақсадида авиакомпания 2022 йилнинг 30 октябридан бошлаб Фарғона—Дубай—Фарғона йўналиши бўйича янги авиақатновларни йўлга қўяди. Парвозлар ҳафтада 2 марта: сешанба ва якшанба кунлари амалга оширилади.

Авиакомпания 2022 йилнинг 31 октябридан бошлаб Тошкент—Шаржа—Тошкент йўналиши бўйича мунтазам тўғридан-тўғри парвозлар сонини оширмоқда. Рейслар ҳафтанинг душанба, пайшанба ва якшанба кунлари амалга оширилади.