Qirg‘iziston Jogorku Kenesh (respublika bir palatali parlamenti) yig‘ilishida Rossiyada e’lon qilingan qisman safarbarlik fonida mamlakatga kelayotgan rossiyaliklarni davlat idoralari nazorat qilishi kerakligi aytildi, deya xabar beradi “RBK”.
Jogorku Kenesh deputati Nodira Normatining so‘zlariga ko‘ra, rossiyaliklarning tashrifidan maqsad “ko‘plab savollar va xavotirlarni keltirib chiqarmoqda”.
“Aniq raqamlarni hisoblay olmasak-da, Rossiyadan kelganlar soni ortganligi ma’lum. Tegishli hujjatlarni taqdim etmaguncha, biz ularni qochqin deb atay olmaymiz. Ularning Qirg‘izistonga nima maqsadda kelayotgani ma’lum emas”, — deydi deputat.
“Rossiyaliklar respublikada faqat bir oydan so‘ng ro‘yxatdan o‘tadi va rasmiylar bu vaqt davomida ularning nima qilayotganini bilmaydi. Davlat manfaatlari hamma narsadan ustun turishi kerak. Bishkek va O‘shda ular (tashrif buyurgan ruslar) juda ko‘p”, — deb qo‘shimcha qildi Narmatova.
Shu bilan birga, Milliy xavfsizlik davlat qo‘mitasi matbuot kotibi Qanjar Baqoyevning aytishicha, departamentda chegarani kesib o‘tgan barcha rossiyaliklar haqida ma’lumot bor.
“Bizga kelgan ruslarning aniq soni bor. Hisob va ularning qolish vaqti belgilangan. Ichki ishlar vazirligi bilan birgalikda ularning ekstremistik va terroristik guruhlarga aloqadorligini tekshirmoqdamiz”, — dedi u.
Respublika raqamli rivojlanish vaziri o‘rinbosari Aidarbek Mambetqodirov, o‘z navbatida, tashrif buyurgan rossiyaliklar o‘ziga xos qonunchilik maqomiga ega emasligini ta’kidladi:
“Ular xorijlik sifatida kelgan tashqi emigrant hisoblanadi. Rasmiy ma’lumotga ko‘ra, 2022-yilning atigi to‘qqiz oyida, Rossiyadan Qirg‘izistonga 190 ming kishi kelgan, ular orasida sayyohlar ham bor.
Shu bilan birga, Mehnat, ijtimoiy himoya va migratsiya vaziri Xudoybergen Bazarboyevning aytishicha, yil boshidan buyon respublikaga 760 ming rossiyalik kelgan, ulardan 730 ming nafari keyinchalik Qirg‘izistonni tark etgan.
Izoh (0)