Kuvayt Osiyoda hamkorlik va ishonch choralari bo‘yicha kengashga qo‘shiladi
Osiyoda hamkorlik va ishonch choralari bo‘yicha kengashga Kuvayt ham qo‘shiladi, deb xabar beradi “Informburo.kz”. Qaror Ostonadagi sammitda qabul qilinadi.
Oliy mansabdor shaxslar qo‘mitasi Kuvaytning Osiyoda hamkorlik va ishonchni mustahkamlash bo‘yicha konferensiyaga a’zo davlat sifatida qo‘shilishi to‘g‘risidagi qaror loyihasini ma’qulladi va Ostona shahrida bo‘lib o‘tadigan kengash sammitida uni qabul qilishni tavsiya qildi, deb xabar beradi tashkilot kotibiyati.
2019-yilda Qozog‘iston Kuvaytni Osiyoda kelajak xavfsizlik tizimining arxitekturasini birgalikda qurish imkoniyatini beruvchi CICA jarayoniga qo‘shilishni taklif qilgan edi.
Kimlar qatnashmoqda?
Bu sammit Osiyo mintaqasining deyarli barcha davlat yoki hukumat rahbarlari ishtirok etayotgani inobatga olinsa, xalqaro hamkorlikni kengaytirish bo‘yicha noyob muloqot maydoni hisoblanadi. Bugunga qadar 51 ta delegatsiya rahbarlari sammitda ishtirok etishini tasdiqlagan. Ularning 12 nafari davlat rahbarlaridir.
Xususan, O‘zbekiston, Turkiya, Ozarbayjon, Rossiya, Iroq, Eron, Qatar, Falastin kabi mamlakatlar prezidentlari sammitda qatnashadi. Markaziy Osiyo mintaqasidan esa faqatgina Afg‘oniston ishtirok etmayapti.
Sammitning asosiy prinsiplari
Suveren tenglik va suveren huquqlarni hurmat qilish, nizolarni tinch yo‘l bilan hal qilish, iqtisodiy, ijtimoiy va madaniy hamkorlik, davlatlarning ichki ishlariga aralashmaslik, kuch ishlatmaslik yoki kuch ishlatish bilan tahdid qilmaslik, davlatlarning hududiy yaxlitligi, qurolsizlanish va qurollarni nazorat qilish, inson huquqlari va asosiy erkinliklarini hurmat qilishdan iborat.
Osiyoda hamkorlik va ishonch choralari bo‘yicha kengashiga qaysi mamlakatlar a’zo?
Kengashning doimiy a’zolari: O‘zbekiston, Ozarbayjon, Afg‘oniston, Bahrayn, Bangladesh, Vyetnam, Misr, Isroil, Hindiston, Iordaniya, Iroq, Eron, Qozog‘iston, Qatar, Kambodja, Xitoy, Janubiy Koreya, Qirg‘iziston, Mo‘g‘uliston, BAA, Pokiston, Falastin, Rossiya, Tojikiston, Tailand, Turkiya, Shri-Lanka.
Kengashda kuzatuvchi maqomidagi mamlakatlar: Belarus, Indoneziya, Malayziya, AQSH, Ukraina, Filippin, Yaponiya, Laos va Turkmaniston.
