Isroil va Livan dengizdagi chegarasi bo‘yicha kelishmovchilikni hal qildi
Isroil va Livan AQSH vositachiligida ikki mamlakat o‘rtasidagi dengiz chegarasi qayerda joylashgani va ulardan qaysi biri O‘rta Yer dengizidagi qator gaz konlarini o‘zlashtirish huquqiga ega ekani bo‘yicha bahsda murosaga erishdi. Bu haqda 11-oktabr kuni Isroil bosh vaziri Yair Lapid ma’lum qildi va bu kelishuvni “tarixiy yutuq” deb atadi.
Foto: Flash 90
Hujjat 12-oktabr kuni milliy xavfsizlik masalalari bo‘yicha vazirlar qo‘mitasiga taqdim etilishi kutilmoqda.
Livan bilan dengiz chegarasi va O‘rta Yer dengizidagi gaz konlarini o‘zlashtirish huquqi masalasida aniqlik Isroilning Yevropa Ittifoqiga gaz yetkazib beruvchi sifatidagi rolini oshirishi mumkin. Livan tomoni ham erishilgan kelishuvdan mamnunligini istisno qilmadi. Isroil bilan chegara bo‘yicha yakuniy kelishuv Livanning “talablarini qondiradi” va uning resurslarga bo‘lgan huquqlarini tasdiqlaydi, deb xabar berdi mamlakat prezidenti Mishel Aun idorasi Twitter’dagi sahifasida.
Bayrutdan kelishuvning rasmiy tasdig‘i hali olinmagan, biroq Livanning muzokaralar delegatsiyasi rahbari Elias Bou Saab optimizm bildirib, kelishuv “adolatli” ekanini ta’kidladi.
Dpa agentligining Vashingtondagi yuqori martabali amerikalik amaldorga tayanib xabar berishicha, Qo‘shma Shtatlar Livan tomonidan Isroil bilan kelishuv shartlariga amal qilishini tasdiqlagan. Shu bilan birga, AQSH kelishuvni amalga oshirishda muammolar yuzaga kelsa, yana vositachi bo‘lishga tayyor.
Berlin ham tomonlarning diplomatik sa’y-harakatlarini yuqori baholab, Isroil va Livan o‘rtasidagi chegarani qo‘riqlash mintaqaviy barqarorlik va xavfsizlik yo‘lidagi muhim qadam ekanini ta’kidladi.
Kelishuvning aniq tafsilotlari hozircha oshkor etilmagan. Shu bilan birga, Isroil OAVlari Livan Kana gaz maydonidagi gaz konini o‘zlashtirish huquqini qo‘lga kiritishi, Isroil esa Isroilning Xayfa port shahri shimoli-g‘arbida joylashgan Karish gaz koni atrofidagi hududni saqlab qolishi haqida xabar bermoqda.
Rasmiy ravishda Livan va Isroil hali ham urush holatida. Mamlakatlar o‘rtasidagi dengiz chegarasi bo‘yicha muzokaralar 2020-yilda boshlangan. So‘nggi kelishuv ularning o‘tgan o‘n yilliklardagi xavfsizlik masalasi ko‘tarilmagan birinchi muloqoti bo‘ldi.
Izoh (0)