Қирғизистон Жогорку Кенеш (республика бир палатали парламенти) йиғилишида Россияда эълон қилинган қисман сафарбарлик фонида мамлакатга келаётган россияликларни давлат идоралари назорат қилиши кераклиги айтилди, дея хабар беради «РБК».
Жогорку Кенеш депутати Нодира Норматининг сўзларига кўра, россияликларнинг ташрифидан мақсад «кўплаб саволлар ва хавотирларни келтириб чиқармоқда».
«Аниқ рақамларни ҳисоблай олмасак-да, Россиядан келганлар сони ортганлиги маълум. Тегишли ҳужжатларни тақдим этмагунча, биз уларни қочқин деб атай олмаймиз. Уларнинг Қирғизистонга нима мақсадда келаётгани маълум эмас», — дейди депутат.
«Россияликлар республикада фақат бир ойдан сўнг рўйхатдан ўтади ва расмийлар бу вақт давомида уларнинг нима қилаётганини билмайди. Давлат манфаатлари ҳамма нарсадан устун туриши керак. Бишкек ва Ўшда улар (ташриф буюрган руслар) жуда кўп», — деб қўшимча қилди Нарматова.
Шу билан бирга, Миллий хавфсизлик давлат қўмитаси матбуот котиби Қанжар Бақоевнинг айтишича, департаментда чегарани кесиб ўтган барча россияликлар ҳақида маълумот бор.
«Бизга келган русларнинг аниқ сони бор. Ҳисоб ва уларнинг қолиш вақти белгиланган. Ички ишлар вазирлиги билан биргаликда уларнинг экстремистик ва террористик гуруҳларга алоқадорлигини текширмоқдамиз», — деди у.
Республика рақамли ривожланиш вазири ўринбосари Аидарбек Мамбетқодиров, ўз навбатида, ташриф буюрган россияликлар ўзига хос қонунчилик мақомига эга эмаслигини таъкидлади:
«Улар хорижлик сифатида келган ташқи эмигрант ҳисобланади. Расмий маълумотга кўра, 2022 йилнинг атиги тўққиз ойида, Россиядан Қирғизистонга 190 минг киши келган, улар орасида сайёҳлар ҳам бор.
Шу билан бирга, Меҳнат, ижтимоий ҳимоя ва миграция вазири Худойберген Базарбоевнинг айтишича, йил бошидан буён республикага 760 минг россиялик келган, улардан 730 минг нафари кейинчалик Қирғизистонни тарк этган.
Изоҳ (0)