O‘zbekiston Milliy universitetining Nodir qo‘lyozmalar muzeyida saqlanayotgan bir qator kitoblar yo‘qolgani yuzasidan jinoyat ishi qo‘zg‘atilgandi. 10-oktabr kuni ushbu jinoyat ishi bo‘yicha qamoqqa olingan axborot resurs markazi direktoriga nisbatan sud ishi ko‘rib chiqildi.
“Sevimli” telekanalining “Zamon” informatsion dasturida ma’lum qilinishicha, prokuratura tekshiruvlardan so‘ng umumiy bahosi 2 milliard so‘mdan ortiq bo‘lgan 57 dona tarixiy qo‘lyozma, 12 ta toshbosma va 9 ta tarixiy hujjatlari talon-toroj qilingani va boshqa jiddiy qonunbuzilish holatlarini aniqlagan.
Axborot-resurs markazi direktori vazifasini vaqtincha bajarayotgan Aziz Ramazonov kim aybdor bo‘lsa ham 2,6 milliard so‘mni undirib berish kerakligini aytgan.
Jinoyat ishlari bo‘yicha Mirzo Ulug‘bek tumani sudida ko‘rib chiqilgan sud ishi 2 soatdan ortiq davom etgan. Sudya davlat ayblovchisi va uch nafar advokatlarning fikrlarini tinglagan. Shundan so‘ng hukmni e’lon qilgan. Sudlanuvchi Jinoyat kodeksining tegishli moddalari bilan aybli deb topilib, unga uzil kesil 2 yil muddatga mansabdorlik va moddiy javobgarlik lavozimlarida ishlash huquqidan mahrum qilinib, 5 yil 1 oy muddatga ozodlikdan mahrum qilish jazosi tayinlangan.
Sudlanuvchi ayol tergov davomida unga qo‘yilgan ayb isbotlanmaganini va asossiz ekanini bildirgan.
“Hamma ko‘rsatmalarni, guvohlarni eshitdingiz. Men aybdor emasman. Haqqoniy ishladim. Kitoblarni men o‘g‘irlamaganman, birorta isbot yo‘q. Meni sotdi deb kim aytdi? Kimga sotibman? Kimga taklif qildim? Men 40 yil davomida halol ishladim. Kutubxonadagi birorta kitobni tashqariga olib chiqmaganman. Hech kimga hech narsa sotmaganman”, — degan u.
Sudlanuvchining qizi va advokati ham sud hukmidan norozi bo‘lib, appelyatsiya shikoyati yozishini aytgan.
O‘zi nima gap?
O‘zbekiston Milliy universitetida 2018-yilda kapital ta’mirlash ishlari amalga oshirilgan. Bu jarayonda universitetning qo‘lyozmalar saqlanuvchi tarix muzeyidagi nodir kitoblar vaqtincha boshqa joyga ko‘chirilgan (ma’lumotlarga ko‘ra, muzeyda 1465 nomdagi o‘zbek, fors, turkiy, arab va tojik tillarida arabcha imloda yozilgan qo‘lyozma kitoblar, xat va hujjatlar saqlangan).Ta’mirlash tugagach, muzey qayta (hali ham) ochilmagan. “Kun.uz” ma’lumotiga ko‘ra, bunga sabab — “u yerdagi qimmatbaho va o‘ta nodir hisoblangan 100 dan ortiq kitob sotib yuborilgan bo‘lishi mumkin”ligi — ta’mirlashdan keyingi xatlovda aynan shuncha qadimiy qo‘lyozma chiqmagan.
2022-yilning fevralida universitet mansabdor va moddiy javobgar shaxslari, xususan Axborot resurs markazi direktori va boshqalarga nisbatan Jinoyat kodeksining 167-moddasi 3-qismi “a” bandi, 207-moddasi 1-qismi va 227-moddasi 1-qismi bilan jinoyat ishi qo‘zg‘atilgandi.
“Sevimli” telekanalida namoyish etilgan informatsion dasturda jinoyat ishining boshqa a’zolari haqida ma’lumot berilmagan.
Izoh (0)