Turkiyaning Istanbul shahridagi uylardan birida sodir bo‘lgan portlashda ikki o‘zbekistonlik halok bo‘ldi. Bu haqda Haberturk nashri xabar berdi.
Voqea 9-oktabr kuni Istanbulning Kadiko‘y tumanida 3 qavatli uyning uchinchi qavatida sodir bo‘lgan. Portlash ortidan yong‘in kelib chiqqan va yonidagi 2 ta binoga ham tarqalgan. Yong‘inni o‘chirishga 56 o‘t o‘chiruvchi va 19 ta texnika jalb qilingan va 3 soatda yong‘in bartaraf etilgan.
Hodisa oqibatida O‘zbekiston fuqarosi bo‘lgan A.K. jarohat olib, shifoxonaga yotqizilgan. Uning 68 yoshli otasi M.K., 10 yoshli qizi N.K. hamda shaxsi aniqlanmagan yana bir kishi halok bo‘lgani aniqlangan.
O‘zbekistonning Istanbuldagi bosh konsulxonasining “Gazeta.uz”ga ma’lum qilishicha, ayni paytda konsulxona xodimlari jarohatlangan fuqaroning ahvolidan boxabar bo‘lib turibdi, shuningdek, marhumlarning jasadlarini O‘zbekistonga jo‘natish masalalari bilan shug‘ullanmoqda.
Ayni paytda portlash sababiga aniqlik kiritilmoqda.
Izoh (0)