“Daryo”da Qashqadaryo viloyatining Chiroqchi tumanida tug‘ilgan farzandini davolatish uchun Samarqandga olib borgan va bolasini shifoxonada yo‘qotib qo‘ygan ota-ona muammosi yoritilgandi. Bosh prokuratura axborot xizmati rahbari Hayot Shamsutdinovning “Daryo”ga ma’lumot berishicha, mazkur murojaat Bosh prokuratura nazoratiga olingan.
Holat Bosh prokuratura nazoratiga olindi. Voqea yuzasidan tegishli tarmoqlar holatni o‘rganmoqda, — deydi Hayot Shamsutdinov.Qashqadaryo viloyatining Chiroqchi tumanida tug‘ilgan Asilbek Ollaberganov onasining aytishicha, 2022-yilning 12-may kuni Samarqand shahridagi viloyat bolalar ko‘p tarmoqli tibbiyot markaziga olib borilgan va shu shifoxonada boshqa bola bilan almashib qolgan.
Shifoxona bosh shifokori Mamatqul Azizovning “Daryo”ga ma’lumot berishicha, uch nafar chaqaloq — Ziyoda Jovliyevaning Asilbek, E’zoza Umarovaning Hasan-Husan ismli farzandlari shifoxonaga olib kelinganda ularda yorliq bo‘lmagan.
Egizaklar 12-may kuni soat 10:30 da, Ziyoda Jovliyevaning chaqalog‘i esa 10:45 da bo‘lim mudiri Aziza Mirmuhamedova, hamshira Farangiz Isayeva tomonidan qabul qilib olingan. Qabul vaqtida yangi tug‘ilgan bolalar to‘g‘risidagi ma’lumotlar yozilgan yorliq (birka) bo‘lmagan. Neonatologiya bo‘limida esa har bir qabul qilingan bemorga maxsus stiker yopishtirilishi haqida nizom mavjud. Unda bemor haqida ma’lumot to‘ldiriladi (onasining FISH, bolaning tug‘ilgan sanasi, kasalxonaga yotqizilgan sana va vaqt, vazni va bo‘yi, turar-joy manzili, shifokorning to‘liq ismi) va kasallik tarixi rasmiylashtirilgan, — degandi tibbiyot markazi bosh shifokori Mamatqul Azizov.Qashqadaryo viloyati Sog‘liqni saqlash boshqarmasi bosh pediatri G‘.Olmosov hamda Chiroqchi tuman tibbiyot birlashmasi boshlig‘i E.Arziyevning viloyat Sog‘liqni saqlash boshqarmasi boshlig‘iga yozgan ma’lumotnomasida esa Ziyoda Jovliyevaning farzandi muddatidan avval, 35 haftalik bo‘lib tug‘ilgani, undagi kasallikni davolash uchun Qarshi shahridagi bolalar shifoxonasida imkoniyat yo‘qligi ma’lum qilingan.
Ziyoda Jovliyevaning farzandida aniqlangan kasallikni davolash uchun bola Samarqand shahriga yuborilgan. Chaqaloq Samarqandga yuborilishidan avval unga tug‘gan onasining ism-sharifi, tug‘ilgan sanasi, jinsi va vazni yozilgan yorliq yopishtirilib, keyin shifoxonaga olib ketilgan, — degandi qashqadaryolik shifokorlar bola shifoxonaga yorliqsiz yuborilgan degan gapga javoban.“Daryo”ga takroran murojaat qilgan ota-ona “Mas’ullarga murojaat qilib, agar mening bolam o‘lik bo‘lsa, o‘ligini; tirik bo‘lsa, tirigini topib bering, dedim. Qashqadaryo viloyat prokuraturasi va viloyat Ichki ishlar boshqarmasi voqea boshqa hududda bo‘lganligini, shu sabab voqeani o‘rganish ularning vakolatiga kirmasligini aytmoqda. Samarqand viloyati prokuraturasi esa ko‘milgan chaqaloq Qashqadaryoda ekani, shu sabab bu ish bilan Qashqadaryo prokuraturasi shug‘ullanishi kerakligini aytdi, — degandi.
Izoh (0)