Ўзбекистон Миллий университетининг Нодир қўлёзмалар музейида сақланаётган бир қатор китоблар йўқолгани юзасидан жиноят иши қўзғатилганди. 10 октябрь куни ушбу жиноят иши бўйича қамоққа олинган ахборот ресурс маркази директорига нисбатан суд иши кўриб чиқилди.
«Севимли» телеканалининг «Замон» информацион дастурида маълум қилинишича, прокуратура текширувлардан сўнг умумий баҳоси 2 миллиард сўмдан ортиқ бўлган 57 дона тарихий қўлёзма, 12 та тошбосма ва 9 та тарихий ҳужжатлари талон-торож қилингани ва бошқа жиддий қонунбузилиш ҳолатларини аниқлаган.
Ахборот-ресурс маркази директори вазифасини вақтинча бажараётган Азиз Рамазонов ким айбдор бўлса ҳам 2,6 миллиард сўмни ундириб бериш кераклигини айтган.
Жиноят ишлари бўйича Мирзо Улуғбек тумани судида кўриб чиқилган суд иши 2 соатдан ортиқ давом этган. Судья давлат айбловчиси ва уч нафар адвокатларнинг фикрларини тинглаган. Шундан сўнг ҳукмни эълон қилган. Судланувчи Жиноят кодексининг тегишли моддалари билан айбли деб топилиб, унга узил кесил 2 йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилиниб, 5 йил 1 ой муддатга озодликдан маҳрум қилиш жазоси тайинланган.
Судланувчи аёл тергов давомида унга қўйилган айб исботланмаганини ва асоссиз эканини билдирган.
«Ҳамма кўрсатмаларни, гувоҳларни эшитдингиз. Мен айбдор эмасман. Ҳаққоний ишладим. Китобларни мен ўғирламаганман, бирорта исбот йўқ. Мени сотди деб ким айтди? Кимга сотибман? Кимга таклиф қилдим? Мен 40 йил давомида ҳалол ишладим. Кутубхонадаги бирорта китобни ташқарига олиб чиқмаганман. Ҳеч кимга ҳеч нарса сотмаганман», — деган у.
Судланувчининг қизи ва адвокати ҳам суд ҳукмидан норози бўлиб, аппеляция шикояти ёзишини айтган.
Ўзи нима гап?
Ўзбекистон Миллий университетида 2018 йилда капитал таъмирлаш ишлари амалга оширилган. Бу жараёнда университетнинг қўлёзмалар сақланувчи тарих музейидаги нодир китоблар вақтинча бошқа жойга кўчирилган (маълумотларга кўра, музейда 1465 номдаги ўзбек, форс, туркий, араб ва тожик тилларида арабча имлода ёзилган қўлёзма китоблар, хат ва ҳужжатлар сақланган).Таъмирлаш тугагач, музей қайта (ҳали ҳам) очилмаган. «Kun.uz» маълумотига кўра, бунга сабаб — «у ердаги қимматбаҳо ва ўта нодир ҳисобланган 100 дан ортиқ китоб сотиб юборилган бўлиши мумкин»лиги — таъмирлашдан кейинги хатловда айнан шунча қадимий қўлёзма чиқмаган.
2022 йилнинг февралида университет мансабдор ва моддий жавобгар шахслари, хусусан Ахборот ресурс маркази директори ва бошқаларга нисбатан Жиноят кодексининг 167-моддаси 3-қисми «а» банди, 207-моддаси 1-қисми ва 227-моддаси 1-қисми билан жиноят иши қўзғатилганди.
«Севимли» телеканалида намойиш этилган информацион дастурда жиноят ишининг бошқа аъзолари ҳақида маълумот берилмаган.
Изоҳ (0)