“Ikkalamiz ham o‘z mamlakatimizning qo‘shiqchilarimiz”. Zemfira Tel-Avivda Pugachyova bilan ko‘rishdi

Qo‘shiqchi Zemfira 11-oktabr kuni Tel-Avivdagi konsertida Alla Pugachyova bilan ko‘rishganini ma’lum qildi. Bu haqda u Instagram orqali gapirib berdi va Pugachyova bilan birga tushgan suratini joyladi.

“Alla Borisovna konsertga keldi, musiqachilarni maqtadi, menga sahnada yosh boladay ko‘rinishimni aytdi. Men esa bunga javoban aytmoqchimanki — siz zo‘rsiz. Buyukligingizga shubha yo‘q. Musiqani qanday his qilishimiz muhim emas, ikkalamiz ham o‘z mamlakatimiz xonandalarimiz”, — deb yozdi u.

9-oktabr kuni Zemfira Borderline albomi bilan Yevropa bo‘ylab konsert turini boshladi. Limasolda bo‘lib o‘tgan ilk konsertida u Ukrainadagi urush haqida birinchi marta ochiq gapirdi. “Har kuni urush tugasin, mamlakatim bu urushni to‘xtatsin, deb duo qilaman”, — dedi.

24 fevral — Rossiya Ukrainaga bostirib kirgan kuni Zemfira besh yil ichida birinchi yakkaxon konserti bilan Moskvada chiqish qilgan edi. Unda to‘g‘ridan to‘g‘ri urushga qarshi bayonotlar yangramagan, lekin o‘sha kuni ijrochining saytida va ijtimoiy tarmoqlarida “Urushga yo‘q” yozuvi paydo bo‘lgan. Xonanda 26-fevral kuni Moskvada navbatdagi konsert dasturini taqdim etdi. Shundan so‘ng, Zemfira Rossiyani tark etib, Parijga ko‘chib o‘tgani ma’lum bo‘ldi.

Mart oyida Zemfira “O‘q uzmang” qo‘shig‘iga Ukrainadagi jangovar harakatlar aks etgan klip e’lon qildi, may oyida u urushga ishora qiluvchi yangi “Go‘sht” qo‘shig‘ini taqdim etdi. Yevropa gastroli boshlanishidan oldin “Lukadan Zemfira” mini-albomi chiqarildi, uning matnlarida urushga ishoralar bor.

Alla Pugachyova Rossiyani tark etdi

Keyinroq u Isroil pasportini olgani, Rossiyadagi qasrini esa sotuvga qo‘ygani xabar berildi. Shuningdek, uning qo‘shiqlari radioto‘lqinlardan olib tashlandi.

20-sentabr kuni kuni xonandaning ustidan shikoyat tushgandi. Bunga sabab esa Pugachyova Rossiya Adliya vazirligidan eri Maksim Galkin va o‘zini “xorijiy agent” deb e’lon qilishni so‘ragan. U o‘z Instagram’ida erini “Rossiyaning haqiqiy vatanparvari” deb atab, “tinch hayot, so‘z erkinligi” va “yigitlarning xayoliy maqsadlar yo‘lidagi o‘limiga chek qo‘yilishini” tilagan edi.

Rossiya Ukrainaga bostirib kirgach, bir qator san’atkorlar urushga qarshi chiqdi, ularning ayrimlari Rossiyani tark etdi. Urush va Putinni  tanqid qilgan artistlar deyarli darhol konsertlari bekor qilinishi holatiga duch keldi. Ularning bir qatori esa “xorijiy agentlar” ro‘yxatiga kiritildi.

Maksim Galkin san’atkorlar orasida birinchilardan bo‘lib Ukrainadagi vaziyat bo‘yicha o‘z fikrlarini bildirgan. U televideniyeda “maxsus operatsiya” to‘g‘risida yangiliklar haddan tashqari ko‘payib ketganini aytgan. Bundan tashqari, Rossiya telekanallaridagi senzura hamda prezident Vladimir Putin siyosatini tanqid qilgan. Bundan g‘azabga kelgan ayrim odamlar uni vatan xoiniga chiqargan va Galkinning Arxangelsk shahrida o‘tishi rejalashtirilayotgan konserti bekor qilingan.

Oxir-oqibat Alla Pugachyova hamda Maksim Galkin egizak farzandlarini olib, Isroilga jo‘nab ketgandi. Avgust oxirida esa Pugachyovaning o‘zi farzandlari bilan Rossiyaga qaytib keldi.

Sentabr boshida Rossiya prezidenti matbuot kotibi Dmitriy Peskov birinchi marta Putinni va Ukrainadagi urushni tanqid qiluvchi san’atkorlarga munosabat bildirib, Pugachyovaga prezident “juda yaxshi” munosabatda ekanini aytgandi. “Ular bir-birini biladi, ular tanish, bir necha marta uchrashishgan”, — dedi Peskov.