«Дарё»да Қашқадарё вилоятининг Чироқчи туманида туғилган фарзандини даволатиш учун Самарқандга олиб борган ва боласини шифохонада йўқотиб қўйган ота-она муаммоси ёритилганди. Бош прокуратура ахборот хизмати раҳбари Ҳаёт Шамсутдиновнинг «Дарё»га маълумот беришича, мазкур мурожаат Бош прокуратура назоратига олинган.
Ҳолат Бош прокуратура назоратига олинди. Воқеа юзасидан тегишли тармоқлар ҳолатни ўрганмоқда, — дейди Ҳаёт Шамсутдинов.Қашқадарё вилоятининг Чироқчи туманида туғилган Асилбек Оллаберганов онасининг айтишича, 2022 йилнинг 12 май куни Самарқанд шаҳридаги вилоят болалар кўп тармоқли тиббиёт марказига олиб борилган ва шу шифохонада бошқа бола билан алмашиб қолган.
Шифохона бош шифокори Маматқул Азизовнинг «Дарё»га маълумот беришича, уч нафар чақалоқ — Зиёда Жовлиеванинг Асилбек, Эъзоза Умарованинг Ҳасан-Ҳусан исмли фарзандлари шифохонага олиб келинганда уларда ёрлиқ бўлмаган.
Эгизаклар 12 май куни соат 10:30 да, Зиёда Жовлиеванинг чақалоғи эса 10:45 да бўлим мудири Азиза Мирмуҳамедова, ҳамшира Фарангиз Исаева томонидан қабул қилиб олинган. Қабул вақтида янги туғилган болалар тўғрисидаги маълумотлар ёзилган ёрлиқ (бирка) бўлмаган. Neonатология бўлимида эса ҳар бир қабул қилинган беморга махсус стикер ёпиштирилиши ҳақида низом мавжуд. Унда бемор ҳақида маълумот тўлдирилади (онасининг ФИШ, боланинг туғилган санаси, касалхонага ётқизилган сана ва вақт, вазни ва бўйи, турар-жой манзили, шифокорнинг тўлиқ исми) ва касаллик тарихи расмийлаштирилган, — деганди тиббиёт маркази бош шифокори Маматқул Азизов.Қашқадарё вилояти Соғлиқни сақлаш бошқармаси бош педиатри Ғ.Олмосов ҳамда Чироқчи туман тиббиёт бирлашмаси бошлиғи Э.Арзиевнинг вилоят Соғлиқни сақлаш бошқармаси бошлиғига ёзган маълумотномасида эса Зиёда Жовлиеванинг фарзанди муддатидан аввал, 35 ҳафталик бўлиб туғилгани, ундаги касалликни даволаш учун Қарши шаҳридаги болалар шифохонасида имконият йўқлиги маълум қилинган.
Зиёда Жовлиеванинг фарзандида аниқланган касалликни даволаш учун бола Самарқанд шаҳрига юборилган. Чақалоқ Самарқандга юборилишидан аввал унга туғган онасининг исм-шарифи, туғилган санаси, жинси ва вазни ёзилган ёрлиқ ёпиштирилиб, кейин шифохонага олиб кетилган, — деганди қашқадарёлик шифокорлар бола шифохонага ёрлиқсиз юборилган деган гапга жавобан.«Дарё»га такроран мурожаат қилган ота-она «Масъулларга мурожаат қилиб, агар менинг болам ўлик бўлса, ўлигини; тирик бўлса, тиригини топиб беринг, дедим. Қашқадарё вилоят прокуратураси ва вилоят Ички ишлар бошқармаси воқеа бошқа ҳудудда бўлганлигини, шу сабаб воқеани ўрганиш уларнинг ваколатига кирмаслигини айтмоқда. Самарқанд вилояти прокуратураси эса кўмилган чақалоқ Қашқадарёда экани, шу сабаб бу иш билан Қашқадарё прокуратураси шуғулланиши кераклигини айтди, — деганди.
Изоҳ (0)