Indoneziya tashqi ishlar vaziri Retno Marsudi Rossiya prezidenti Vladimir Putin va Ukraina prezidenti Vladimir Zelenskiy Balidagi G20 sammitida ishtirok etishini tasdiqladi, deya xabar beradi “Kommersant”.
“Bizning taklifimizga javoblar hali ham ijobiy”, — dedi Marsudi xonim Jakartadagi matbuot anjumanida.
Vazirning qo‘shimcha qilishicha, uning idorasi “ikki davlat rahbarlari bilan aloqa o‘rnatishda davom etmoqda”. Uning ta’kidlashicha, dunyodagi vaziyat beqarorligicha qolmoqda.
Avvalroq indoneziyalik diplomatlar noyabr oyi o‘rtalarida bo‘lib o‘tishi rejalashtirilgan sammitda har ikki davlat rahbarlari ishtirok etishi haqida allaqachon xabar bergan edi. Bu haqda, xususan, Indoneziyaning BAAdagi elchisi Husin Bagisga tayanib, 7-oktabr kuni The National nashri yozgan. Biroq nashrdan bir necha soat o‘tgach, portal elchining iqtibosini olib tashlagan holda eslatmani o‘zgartirdi.
Hozircha na Moskva, na Kiyev G20 sammitida davlat rahbarlari ishtirok etishini rasman tasdiqlagani yo‘q. Putin va Zelenskiy vakillari Dmitriy Peskov va Sergey Nikiforov mamlakatlarning Balidagi bo‘lish formati bo‘yicha yakuniy qaror hali qabul qilinmaganini ma’lum qilgan.
G20 sammiti 15—16-noyabr kunlari Balida bo‘lib o‘tadi. Indoneziya prezidenti Joko Vidodo Vladimir Putin sammitda shaxsan ishtirok etish niyatida ekanini aytdi. Kreml Putinning tadbirda ishtirok etishi xavfsizlik choralariga bog‘liqligini ma’lum qildi.
Avgust oyida Ukraina prezidenti ofisi agar Putin u yerda bo‘lsa, prezident Zelenskiy ham G20 sammitida ishtirok etishini aytgan edi. Sentabr oyida esa Zelenskiy Putin Rossiya prezidentiligicha qolar ekan, muzokaralar stoliga o‘tirmasligini ma’lum qilgandi.
Izoh (0)