10-oktabr kuni AQSHdagi eng yirik aeroportlarning ba’zilariga xakerlar hujum uyushtirdi, deb xabar beradi “Interfaks”.
Ilk kiberhujumlar Nyu-Yorkdagi La-Guardiya aeroportiga nisbatan amalga oshirilgan. Keyinroq mutaxassislar Los-Anjeles xalqaro aeroporti va Chikagodagi O’Xara xalqaro aeroporti saytlarida ham nosozliklarni qayd etgan.
Hujumlar tufayli, aeroportlarda gavjumlik va kutish vaqti haqida axborot beruvchi saytlar faoliyati buzilgan. Biroq xakerlarning xatti-harakatlari havo harakati boshqaruvi, transport xavfsizligi va samolyotlar bilan aloqa liniyalariga ta’sir o‘tkazgani yo‘q.
CNN telekanali qayd etishicha, 14 ta aeroportlar saytlarining ishdan chiqishiga Killnet xakerlar guruhi sababchidir.
9-oktabr kuni, aeroportlarga kiberhujumdan bir kun avval, o‘zini KillMilk deb tanishtirgan Killnet guruhi asoschisi bilan intervyu e’lon qilingandi. U AQSHni “harakatlarimizning so‘nggi homiysi” deb atagandi. “Sakkiz oy davomida biz Yevropani o‘rgandik va sindirdik, bu vaqtda AQSH biz bilan uchrashuvga tayyorlandi. Biz Amerika kibermakonida ijod qilishni endi-endi boshlayapmiz”, — dedi xaker.
Kill Milk o‘zini Rossiyaning qonunga rioya qiladigan fuqarosi deb atadi va guruhning asosiy maqsadi “dushmanga munosib javob berish va yer yuzidagi tinchlik”dan iborat ekanini aytdi.
Killnet xakerlari avval ham G‘arb mamlakatlari tarmoq infratuzilmasini buzishda ayblangan. Xususan, iyulda Litvaning ESO davlat energiya kompaniyasi, avgustda esa Amerikaning Lockheed Martin kompaniyasi zarar ko‘rgandi. Lockheed Martin boshqa narsalar bilan bir qatorda, Ukrainaga yetkazib beriluvchi HIMARS baravar o‘t ochish reaktiv tizimlari va Javelin tankka qarshi raketa majmualarini ishlab chiqaradi.
Izoh (0)