Индонезия ташқи ишлар вазири Ретно Марсуди Россия президенти Владимир Путин ва Украина президенти Владимир Зеленский Балидаги G20 саммитида иштирок этишини тасдиқлади, дея хабар беради «Коммерсантъ».
«Бизнинг таклифимизга жавоблар ҳали ҳам ижобий», — деди Марсуди хоним Жакартадаги матбуот анжуманида.
Вазирнинг қўшимча қилишича, унинг идораси «икки давлат раҳбарлари билан алоқа ўрнатишда давом этмоқда». Унинг таъкидлашича, дунёдаги вазият беқарорлигича қолмоқда.
Аввалроқ индонезиялик дипломатлар ноябрь ойи ўрталарида бўлиб ўтиши режалаштирилган саммитда ҳар икки давлат раҳбарлари иштирок этиши ҳақида аллақачон хабар берган эди. Бу ҳақда, хусусан, Индонезиянинг БААдаги элчиси Ҳусин Багисга таяниб, 7 октябрь куни The National нашри ёзган. Бироқ нашрдан бир неча соат ўтгач, портал элчининг иқтибосини олиб ташлаган ҳолда эслатмани ўзгартирди.
Ҳозирча на Москва, на Киев G20 саммитида давлат раҳбарлари иштирок этишини расман тасдиқлагани йўқ. Путин ва Зеленский вакиллари Дмитрий Песков ва Сергей Никифоров мамлакатларнинг Балидаги бўлиш формати бўйича якуний қарор ҳали қабул қилинмаганини маълум қилган.
G20 саммити 15—16 ноябрь кунлари Балида бўлиб ўтади. Индонезия президенти Жоко Видодо Владимир Путин саммитда шахсан иштирок этиш ниятида эканини айтди. Кремль Путиннинг тадбирда иштирок этиши хавфсизлик чораларига боғлиқлигини маълум қилди.
Август ойида Украина президенти офиси агар Путин у ерда бўлса, президент Зеленский ҳам G20 саммитида иштирок этишини айтган эди. Сентябрь ойида эса Зеленский Путин Россия президентилигича қолар экан, музокаралар столига ўтирмаслигини маълум қилганди.
Изоҳ (0)