Rejissor Zulfiqor Musoqov ilk film namoyishidan 20 yil o‘tgach, “Osmondagi bolalar-3” filmini suratga olishga qaror qildi. O‘smirlar hayotiga bag‘ishlangan film o‘z davrida katta shov-shuvlarga sabab bo‘lgan va to‘qqiz oy mobaynida Alisher Navoiy nomidagi kinosaroyning barcha zallarini band etgan. Xo‘sh, filmning yangi qismida qadrdon chehralardan kimlarni uchratamiz va yangi kiritilgan personajlar qanday rollarni ijro etmoqda? Muxlislarni qiziqtirgan shu kabi savollarga javob olish maqsadida “Daryo” muxbirlari suratga olish maydonchasidan reportaj tayyorladi.
Zulfiqor Musoqov — film rejissori:
— 20 yildan buyon “Filmning davomini qachon suratga olasiz, degan savolni ko‘p berishadi. Oxirgi ikki yilda bu boradagi talablar yanada ko‘p o‘ldi. Shu bois bir yil avval film ssenariysini yozib, Badiiy kengashga taqdim etdim. Afsuski, uning tasdiqlanishi ba’zi sabablarga ko‘ra biroz ortga surildi. Albatta, avvalgi qahramonlarning bari yangi filmda suratga tushadi. Faqat ular ancha ulg‘aygan. Ularni 20 yosh qilib ko‘rsatish imkonsiz. Ularning o‘z hayoti va muammolari bor. Film qachon premyera bo‘lishini oldindan aytolmayman, suratga olish ishlarini endi boshladik. Hali qiladigan ishlarimiz juda ko‘p, — deydi rejissor Zulfiqor Musoqov.
Dilnoza Kubayeva — aktrisa:
— Shu kungacha biror marta Zulfiqor Musoqov bilan ishlamaganman. “Osmondagi bolalar” filmiga taklif etishganida juda xursand bo‘ldim. Chunki bu filmni maza qilib tomosha qilganman va uning har bir sahnasi yod bo‘lib ketgan. Filmda Xurshidning hamkasbi va turmush o‘rtog‘i rolini ijro etyapman. Qahramonim Oypopuk baxtli ayol bo‘lsa-da, unga ona bo‘lish nasib etmagan. Xullas kulgisi ortida dard va baxti ortida armoni bor ayol rolini ijro etyapman, — deydi aktrisa Dilnoza Kubayeva.
Davron G‘ulomov — Xurshid roli ijrochisi:
— “Osmondagi bolalar-3” filmi suratga olinishi haqidagi xabarni eshitganimda negadir xayolimga Dilnoza Kubayeva bilan partnyor bo‘lsam, degan fikr kelgandi. Qarangki, bu aktrisa bilan birgalikda suratga tushish nasib etdi.
Aktyorlikka qiziqishim bo‘lmagan. “Osmondagi bolalar” filmida suratga tushishim esa menga berilgan tuhfa bo‘lgan. Chunki hayotimda film bilan bog‘liq qiziqarli voqealar juda ko‘p. U orqali ko‘plab insonlar bilan tanishdim, “Osmondagi bolalar” filmining nomini sotib, ko‘p ishimni bitirdim. Quvonarlisi, birorta insondan film haqida yomon gap eshitganim yo‘q.
Xurshid roli bilan tomoshabinlarga yaxshi tanish bo‘lgan Davron G‘ulomov bugungi kundagi faoliyati va shaxsiy hayoti haqida ham to‘xtalib o‘tdi.
— Bir necha yildan buyon metall biznesi bilan shug‘ullanaman. Ikki nafar shirin qizcham bor. Zulfiqor Musoqovdan boshqa rejissorlardan ham takliflar bo‘lgan, ammo suratga tushishni istamadim. Chunki asosiy qiziqishim kino emas, — deydi Davron G‘ulomov.
Filmda Lola rolini ijro etgan Kristina Toirova bir necha yildan buyon oilasi bilan Qozog‘istonning Olmaota shahrida istiqomat qiladi. U bor e’tiborini karyerasiga emas, oilasiga qaratgan. Uning Yasmina, Taxmina va Elif ismli qizlari bor.
Film ijodkorlari premyeradan avval ko‘p ma’lumotlarni oshkor etishni istashmadi. Ammo shunisi ma’lumki, Hamdam, Javohir, Xurshid, Baxtiyor, Nargiza va Lola kabi qadrdon personajlar “Osmondagi bolalar-3” kartinasida ham ishtirok etishadi.
Javohir sinfdoshi Nargizaga, Baxtiyor esa Lolaga uylanadi. Javohir malakali sport ustasi bo‘lib, uning egizak farzandlari xalqaro musobaqada g‘olib bo‘ladi. Rejissorning ma’lum qilishicha, yangi film nafaqat yoshlarbop, balki katta yoshdagi insonlar ham tomosha qilishi uchun mo‘ljallanmoqda.
Agar filmning kadrorti voqealariga qiziqsangiz, quyidagi ssilka orqali videoni tomosha qilishingiz mumkin.
Mavzuga doir:
Izoh (0)