Режиссёр Зулфиқор Мусоқов илк фильм намойишидан 20 йил ўтгач, «Осмондаги болалар-3» фильмини суратга олишга қарор қилди. Ўсмирлар ҳаётига бағишланган фильм ўз даврида катта шов-шувларга сабаб бўлган ва тўққиз ой мобайнида Алишер Навоий номидаги киносаройнинг барча залларини банд этган. Хўш, фильмнинг янги қисмида қадрдон чеҳралардан кимларни учратамиз ва янги киритилган персонажлар қандай ролларни ижро этмоқда? Мухлисларни қизиқтирган шу каби саволларга жавоб олиш мақсадида «Дарё» мухбирлари суратга олиш майдончасидан репортаж тайёрлади.
Зулфиқор Мусоқов — фильм режиссёри:
— 20 йилдан буён «Фильмнинг давомини қачон суратга оласиз, деган саволни кўп беришади. Охирги икки йилда бу борадаги талаблар янада кўп ўлди. Шу боис бир йил аввал фильм сценарийсини ёзиб, Бадиий кенгашга тақдим этдим. Афсуски, унинг тасдиқланиши баъзи сабабларга кўра бироз ортга сурилди. Албатта, аввалги қаҳрамонларнинг бари янги фильмда суратга тушади. Фақат улар анча улғайган. Уларни 20 ёш қилиб кўрсатиш имконсиз. Уларнинг ўз ҳаёти ва муаммолари бор. Фильм қачон премьера бўлишини олдиндан айтолмайман, суратга олиш ишларини энди бошладик. Ҳали қиладиган ишларимиз жуда кўп, — дейди режиссёр Зулфиқор Мусоқов.
Дилноза Кубаева — актриса:
— Шу кунгача бирор марта Зулфиқор Мусоқов билан ишламаганман. «Осмондаги болалар» фильмига таклиф этишганида жуда хурсанд бўлдим. Чунки бу фильмни маза қилиб томоша қилганман ва унинг ҳар бир саҳнаси ёд бўлиб кетган. Фильмда Хуршиднинг ҳамкасби ва турмуш ўртоғи ролини ижро этяпман. Қаҳрамоним Ойпопук бахтли аёл бўлса-да, унга она бўлиш насиб этмаган. Хуллас кулгиси ортида дард ва бахти ортида армони бор аёл ролини ижро этяпман, — дейди актриса Дилноза Кубаева.
Даврон Ғуломов — Хуршид роли ижрочиси:
— «Осмондаги болалар-3» фильми суратга олиниши ҳақидаги хабарни эшитганимда негадир хаёлимга Дилноза Кубаева билан партнёр бўлсам, деган фикр келганди. Қарангки, бу актриса билан биргаликда суратга тушиш насиб этди.
Актёрликка қизиқишим бўлмаган. «Осмондаги болалар» фильмида суратга тушишим эса менга берилган туҳфа бўлган. Чунки ҳаётимда фильм билан боғлиқ қизиқарли воқеалар жуда кўп. У орқали кўплаб инсонлар билан танишдим, «Осмондаги болалар» фильмининг номини сотиб, кўп ишимни битирдим. Қувонарлиси, бирорта инсондан фильм ҳақида ёмон гап эшитганим йўқ.
Хуршид роли билан томошабинларга яхши таниш бўлган Даврон Ғуломов бугунги кундаги фаолияти ва шахсий ҳаёти ҳақида ҳам тўхталиб ўтди.
— Бир неча йилдан буён металл бизнеси билан шуғулланаман. Икки нафар ширин қизчам бор. Зулфиқор Мусоқовдан бошқа режиссёрлардан ҳам таклифлар бўлган, аммо суратга тушишни истамадим. Чунки асосий қизиқишим кино эмас, — дейди Даврон Ғуломов.
Фильмда Лола ролини ижро этган Кристина Тоирова бир неча йилдан буён оиласи билан Қозоғистоннинг Олмаота шаҳрида истиқомат қилади. У бор эътиборини карьерасига эмас, оиласига қаратган. Унинг Ясмина, Тахмина ва Элиф исмли қизлари бор.
Фильм ижодкорлари премьерадан аввал кўп маълумотларни ошкор этишни исташмади. Аммо шуниси маълумки, Ҳамдам, Жавоҳир, Хуршид, Бахтиёр, Наргиза ва Лола каби қадрдон персонажлар «Осмондаги болалар-3» картинасида ҳам иштирок этишади.
Жавоҳир синфдоши Наргизага, Бахтиёр эса Лолага уйланади. Жавоҳир малакали спорт устаси бўлиб, унинг эгизак фарзандлари халқаро мусобақада ғолиб бўлади. Режиссёрнинг маълум қилишича, янги фильм нафақат ёшларбоп, балки катта ёшдаги инсонлар ҳам томоша қилиши учун мўлжалланмоқда.
Агар фильмнинг кадрорти воқеаларига қизиқсангиз, қуйидаги ссилка орқали видеони томоша қилишингиз мумкин.
Мавзуга доир:
Изоҳ (0)