AQSHda istiqomat qilayotgan xonanda Sobirjon Mo‘minov nomaqbul ishlar ortidan tanilayotgan insonlar, unga piar takliflari bo‘lgani, ijodni boshlangan paytida qo‘shiq chiqarish uchun bir yillab navbatda turgani, o‘ziga, oilasiga qilingan dushmanliklar va hayotidagi yo‘qotishlari haqida gapirdi.
“Uyida qilmaydigan ishini chiqib ommaga ko‘rsatyapti”
“Munosib insonlarning avlodlarimiz, shuning uchun ba’zi bir bachkanaliklarni, ijtimoiy tarmoqlardagi har xil qiliqlarni tanilish uchun qilishyapti. Tanilish oson, suyukli bo‘lish qiyin. Tanilish, mana qora piar bilan ham tanilyapti. Vaqtincha ismi aytilib turilibdi, xolos. Shunga ketkazgan vaqtini o‘rniga kichkina, yaxshi narsa qilish bilan tanilsa bo‘lmaydimi, degingiz keladi. Ijtimoiy tarmoqlarga ham yozib qo‘ydim, shuning o‘rniga nafaqat o‘zingni o‘yla, balki ortingda xalq, millat turibdi. Bunaqa bachkanalik bilan xalqimizning sha’nini yerga urayapti.
Nafaqat san’at sohasida, balki boshqa sohada ham o‘ziga yarashmagan ishlarni qilish avj olib ketdi. Bu narsa achinarli holat. Boshqalarni ham ko‘ryapmiz, ijtmoiy tarmoqlarda o‘ziga yarashmaydigan qiliqlarni qilyapti. Men bu narsaga doim jon kuydirib qaraganman. Bachkanalik bilan tanilish bo‘lmaydi, bari bir bu narsalarning oxiri voy. Undan ko‘ra o‘shanga ketkazgan vaqtini yaxshi, kichkina narsaga sarflasa kimdir manfaatdor bo‘ladi, kimlardir shundan foydalanadi, ortidan duo qiladi.
Lekin pandemiya paytida bachkana qiliq qilib chiqqanlarni qachonki, kim ko‘rsa ortidan kuladi. U narsa yaxshilikka olib kelmaydi, millatning mavqeyini pastga tushiradi. Har bir inson, har bir kasb egasi o‘zining bilim doirasida millatni, xalqni mavqeyini ko‘tarishi kerak, qayerda bo‘lishidan qat’i nazar. San’at, birov naqsh yasab san’atini ko‘rsatadi, birov tikish bilan, shu san’at darajasiga yetishi kerak. Bachkanalik, u hattoki uyida qilmaydigan ishini chiqib ommaga ko‘rsatyapti”, — deydi xonanda.
Sobirjon Mo‘minov unga piar qilish borasida takliflar bo‘lgani haqida
“Menga ham bir qancha piar variantlarini taklif qilishdi. Har xil, shov-shuv bo‘ladigan gazetalarda, ekranlarda, radioda, televideniyeda ham har xil jurnalistlar, ‘shoumen’lar chiqib qoladi. Mening farzandlarimga ham bu narsani ko‘p taklif qilishdi, har doim rad qilganman. Chunki bu tanilishning oxiri ham bor, taniqli bo‘lish oson, uni ichida qancha qarg‘ish-u, kulgi va nafrat bo‘ladi. Lekin yaxshilikni urug‘i kam bo‘ladi, uni natijasi, unumi chiroyli bo‘ladi. Shuning uchun doim aytaman, yaxshi narsa bilan tanilsa, u ham havasli bo‘ladi, ham ortidan duo qilishadi, ham o‘ziga xos tarzda bir necha yillar davomida undan kimdir foydalanadi. Taniqlilikni emas, insoniyligini hurmat qilish kerak”, — deydi Sobirjon Mo‘minov.
“Badiiy kengashda olti oylab, bir yillab navbatga turar edik”
“Juda ham kuchli badiiy kengash bo‘lardi, badiiy kengashda olti oylab, bir yillab navbatga turar edik, ismimiz yozib qo‘yilar edi. Navbatma-navbat kutardik, qaysidir oyda badiiy kengashga o‘zimimizning mahoratimizni ko‘rsatishga kirardik, u televideniyening ichida bo‘lar edi. Badiiy kengashda Fattohxon Mamadaliyev, Orifxon Hotamov, G‘anijon Toshmatov, buyuk shoirlar, eng kichigi Abduhoshim Ismoilov bo‘lgan. Juda ham kuchli badiiy kengash bo‘lgan, uncha-muncha qo‘shiq, kuy o‘tkazilmas edi, agar ohang kimnikidir bilan o‘xshab qolsa, yana bir qarab keling, deb yaxshi gapirib chiqarib yuborishar edi.
Keyin yana bir yil navbatda turish kerak edi, yana bir yil turmaslik uchun hech kimnikiga o‘xshamagan, original narsa qilib borish kerak edi. Shuning har bitta ijodkorni ifori bo‘lgan, hozir bog‘da bir xil gullar ko‘payib ketgan. Oldin bu bog‘da har xil gullar: lola, atirgul, binafsha ochilgan, uning o‘z ifori bo‘lgan. Hattoki birorta xonanda teleekran orqali chiqish qilayotgan bo‘lsa, musiqasidan kim chiqayotganini bilish darajasida bo‘lgan. Chunki ansambldagi sozandalarning farqi ham shunda edi, bir-biriga o‘xshamagan bo‘lardi. Shuning uchun hamma qarsak chalardi, kuchli mahsulotlar bo‘lgan. Hozir ham tobora yaxshilashyapti, biroq bir xillik ko‘p. Hozirgi yoshlar orasida buning farqiga borayotganlari ham bor, yaxshi narsani urug‘i kam bo‘ladi. Bunga farosat, ilm-ziyo kerak”, — deydi xonanda.
“Issiq-sovuq”ni ham qilishdi, mashinalarimizga, uyimizga ham tashlab ketishgan
“Hayotda bizga nisbatan odamlar tomonidan tushunib-tushunilmay qilingan barcha yomonliklarini ko‘rdik. Ko‘rolmasliklarni ham ko‘rdik, uni aytib doston qilishga hojat yo‘q. Bularni biz umumiy qilib, Allohni sinovi, shu sinovlardan chiroyli o‘tkazganiga shukr, degan xulosaga kelganmiz. Juda ham ko‘p, eslasam ba’zi insonlardan nafratlanishim mumkin, ba’zilariga yaxshi ham shu dushman bor, men bu narsani kuchaytirganman deganman. Sizga dushmanlik holda, o‘zi bilmagan holda yaxshilik qilib qo‘ygan bo‘ladi. Sizni kuchayishingizga, ijod qilishingizga, izlanishingizga sababchi bo‘ladi.
U sizga mazza qilib dushmanlik, lekin Alloh sizga uni orqasidan chiroyli natijalarga erishtiradi. U yana davom ettiradi, sizni tushib ketsin boshqa chuqurlar qazib, tuzoqlar qo‘yib qo‘yadi. Lekin ko‘nglingiz Allohga to‘g‘ri bo‘lgani uchun sizni sinovlarda asrab olib chiqib, yana mukofotlab ham qo‘yadi. Haligi inson qalbi qoraligidan o‘zi battar jazavaga tushib qolib ketadi. Bularning barchasidan o‘tdik. Hattoki bizning dinimizda qoralangan ‘issiq-sovuq’ni ham qilishdi, mashinalarimizga, uyimizga ham tashlab ketishgan. Uyimizga ko‘p odam chaqiraman, pardalarimizga nina, tirnoq, nima bo‘lsa qistirib ketishgan. Qilmagan dushmanliklari qolmagan, hattoki avariya ham qilishgan. Har xil narsalar bo‘lgan”, — deydi Sobirjon Mo‘minov.
“Bir-birimizga dushmanlik qilaversak, millat rivojlanmaydi”
“O‘n yil oldin qanaqa edik, qanchalik darajada tez o‘tdi bu umr, bundan buyog‘i undan ham tez o‘tadi. Buni orasida men sizga, siz menga yomonlik qilishimizning nima foydasi bor? Imkon qadar bir-birimizning duomizni olib, yaxshilik qilishimiz kerak. Shunda xalq, yurt, Vatan insonlar rivojlanadi, bir-birimizga dushmanlik qilaversak, bir-birimizni sindiraversak faqat orqaga qarab ketamiz. Agar bir-birimizga ko‘mak berib, tirgak bo‘lsak, bilmagan narsalarimizni o‘rgatsak tobora yuksaklikka qarab ketamiz.
Bunda xalq, millat rivojlanadi. Biz esa nimaga men emas, u bo‘lishi kerak deb nafsimizga qul bo‘layapmiz. Alloh tepadan qarab turibdi, arzimagan narsa uchun gunohga botishingni qara, deb turgandek go‘yo. Menga esa qo‘limdan kelsa sizga yordam beray, siz menga yordam bering, bilmaganimni o‘rganay deyish kerak. Xalqimizni, yurtimizni rivojlantiramiz, inson uchun hamma narsa zo‘r bo‘ladi. Bir-birimizga dushmanlik qilaversak, millat rivojlanmaydi”, — deydi xonanda.
“Onam yoshligimda dunyodan o‘tgan, bu katta yo‘qotish. Orzularimiz, yoshlikda birga qilgan niyatlarimiz, onamga qilingan va’dalar, bularning hammasi haligacha yuragimning tub-tubida armon bo‘lib yotibdi. U har lahzada o‘zining ta’sirini ko‘rsatadi. Ba’zan ota-onadan maslahat so‘ragingiz keladi, qarasangiz ular o‘zining joyida yo‘q. Afsuslanasiz, bu juda katta, o‘rnini to‘ldirib bo‘lmaydigan yo‘qotish bo‘ladi. Hayotimizda eng katta farzandim qizim bo‘lgan, u ham ikki oyligida vafot etgan, bu ham katta yo‘qotish bo‘lgan. Bizga berilayotgan ko‘p yaxshiliklarni to‘sib, qaytarib qolishgan, u ham katta yo‘qotish. Biz bularning hammasini Yaratganning sinovi deb xulosa va sabr qilyapmiz. Ota-onani yo‘qotish ham katta sinov bo‘lgani uchun, u ham meni hayotda ancha dovdiratib qo‘ygan. Hozir farzandlarimiz katta bo‘lgan, ular bilan ovunib, har qanday holatda ham farzandlarim uchun namuna bo‘lib tik tura olishimiz kerak, Yo, Rabbiy bizni farzandlarimizning oldida kuch-qudrat bo‘lib turishimizga o‘zing kuch bergin, deb so‘rab shunga harakat qilganmiz. Sabr bilan davom etib kelyapmiz”, — deydi Sobirjon Mo‘minov.
Mavzuga doir:
- Instagram: Sobirjon Mo‘minov o‘g‘illarining to‘yi gala konsertga aylandi, Dineyra ona bo‘ldi, Halima Ibragimova xonadonida bayram.
- Instagram: Shohruxxon va Asal Shodiyeva xonadonida bayram, bir kunda 3 o‘g‘lini uylantirgan Sobirjon Mo‘minov, Ra’no Yarasheva oilasida judolik.
- Sobirjon Mo‘minov AQShga ko‘chib ketishi sababi va u yerda nima ish bilan shug‘ullanayotgani haqida so‘zlab berdi.
Izoh (0)