Turkiya Rossiya va G‘arb o‘rtasida muzokaralar tashkil etishni rejalashtirmoqda. Bu haqda kolumnist Ozay Shendir “Milliyet” gazetasi uchun yozgan maqolasida ma’lum qildi. Uning so‘zlariga ko‘ra, tegishli tashabbus maxsus kanallar orqali Vashingtonga yetkazilgan.
Shendir Turkiyaning Ukraina bo‘yicha Rossiya va G‘arb o‘rtasida muloqot tashkil etish rejasini e’lon qildi hamda Anqara AQSH, Fransiya, Germaniya va Buyuk Britaniyani muzokaralarda ishtirok etishga taklif qilmoqchiligini ta’kidladi.
“Bu reja hozircha G‘arb poytaxtlarining barchasi e’tiboriga havola qilinmagan, biroq u muhim va xususiy kanallar orqali AQSHga yetkazilgan. Vashingtondagi nufuzli shaxslarning reja haqidagi dastlabki fikrlari juda ijobiy. Yagona savol shuki, bunday muloqot uchun Rossiyadan suhbatdosh topilarmikan?”, — deydi kolumnist.
Jurnalistning qo‘shimcha qilishicha, Turkiya Ukraina tanlovini hurmat qiladi. Bundan tashqari, ochiq kanallar orqali Anqara tinchlikka qaytishga va taktik yadro qurolidan voz kechishga chaqirmoqda.
“Turkiya ham Kiyev, ham Moskva bilan muloqot o‘rnata oladigan davlatdan bu muloqotda natijaga erishish uchun asosiy rol o‘ynaydigan davlatga aylanmoqda. Yaqin kelajakda G‘arb va Rossiya Turkiya sharofati bilan muzokara stoliga o‘tirishsa, hayron bo‘lmaslik kerak”, — deya xulosa qildi Shandir.
Izoh (0)