Qrim ko‘prigidagi portlash Ukraina maxsus xizmatlari tomonidan uyushtirilgan — The New York Times

Qrim ko‘prigida 8-oktabr kuni ertalab sodir bo‘lgan portlash Ukraina maxsus xizmatlari tomonidan uyushtirilgan, deb yozmoqda The New York Times ismi sir qolishni istagan ukrainalik yuqori martabali amaldorga tayanib.

Nashr suhbatdoshining aytishicha, Ukraina maxsus xizmatlari ko‘prik bo‘ylab ketayotgan yuk mashinasiga bomba o‘rnatgan.

Portlashda Ukraina Xavfsizlik xizmatining qo‘li borligi haqida avvalroq “Ukrainskaya pravda” va “UNIAN” nashrlari huquq-tartibot organlaridagi manbalarga tayanib xabar bergandi. Shuningdek, The Washington Post gazetasi yozishicha, ukrainalik yuqori martabali amaldor portlash ortida Ukraina turganini tasdiqlagan.

Ukraina maxsus xizmatlari Qrim ko‘prigidagi portlash uchun javobgarlikni rasman zimmasiga olganicha yo‘q.

Qrim ko‘prigidagi portlash

8-oktabr kuni ertalab Qrim ko‘prigida yuk mashinasi portlab ketdi. Oqibatda ko‘prikning avtomobillar yuradigan qismida bir nechta tayanchlar oralig‘i qulab tushdi, shuningdek, ko‘prikdagi temiryo‘l orqali ketayotgan sisternali tarkib yonib ketdi. Yong‘in oqibatida bir kilometrdan ortiq temiryo‘l (ko‘prik uzunligi taxminan 19 kilometr) zarar ko‘rgan. Tergov ma’lumotlariga ko‘ra, portlash vaqtida yuk mashinasi yonidan o‘tayotgan mashinada ichidagi uch kishi halok bo‘lgan.

8-oktabr oqshomida Qrim hukumati Qrim ko‘prigi bo‘ylab avtomobillar va poyezdlar harakatini tiklagani, shu bilan birga yuk mashinalari hamon o‘tkazilmayotganini ma’lum qildi. Qrim va Krasnodar o‘lkasi o‘rtasida parom qatnovi tashkil etilgan.